پاکستان کرکٹ بورڈ (پی سی بی) نے قومی کرکٹرز کو پرائیوٹ لیگ کھیلنے کے لیے این او سی دینے کا فیصلہ کرلیا ہے۔

ذرائع کے مطابق پی سی بی اور پلیئرز کے درمیان جاری ڈیڈ لاک کا خاتمہ ہوگیا ہے جب کہ پی سی بی نے قومی کھلاڑیوں کو پرائیوٹ لیگ کے لیے این او سی دینے کا فیصلہ کیا ہے۔

ذرائع کا کہنا ہے کہ بگ بیش لیگ اور ابو ظہبی ٹی ٹین لیگ کے لیے کھلاڑیوں کو آج این او سی جاری ہوں گے۔

بگ بیش لیگ میں قومی کھلاڑی عماد وسیم، حارث رؤف اور اسامہ میر میلبرن اسٹارز کی نمائندگی کریں گے۔

دوسری جانب افتخار احمد اور احمد شہزاد نے نیشنل ٹی ٹوئنٹی کپ کے لیے ابو ظہبی ٹی ٹین لیگ کھیلنے سے انکار کردیا ہے۔

مڈل آرڈر بیٹر افتخار احمد کہتے ہیں کہ میرا ٹی ٹین لیگ سے معاہدہ تھا لیکن میں نے ڈومیسٹک کرکٹ کھیلنے کی وجہ سے معاہدہ منسوخ کردیا۔

انہوں نے کہا تھا کہ میں ڈومیسٹک کرکٹ کھیلنے کے بعد ہی پاکستان کے لیے کھیلا ہوں اور پاکستان کے لیے کھیلنا ہی میرے لیے عزت کا باعث ہے۔

احمد شہزاد کا کہنا تھا کہ میں سب سے پہلے پاکستان میں ڈومیسٹک کرکٹ کھیلنا چاہتا ہوں، میرے لیے سب سے پہلے پاکستان ہے اور اسی کے لیے کھیلنا چاہتا ہوں۔

واضح رہے کہ پاکستان میں نیشنل ٹی ٹوئنٹی کپ جاری ہے جس میں کئی پاکستانی کھلاڑی اپنی صلاحیتوں کا مظاہرہ کرتے نظر آرہے ہیں۔