ایشیاکپ رائزنگ اسٹارز میں پلیئر آف دی ٹورنامنٹ جیتنے والے معاذ صداقت شاہینز پروگرام کے معترف ہوگئے۔
پاکستانی کرکٹر معاذ صداقت نے ایشیاکپ رائزنگ اسٹارز میں شاندار کارکردگی دکھاتے ہوئے پلیئر آف دی ٹورنامنٹ کا اعزاز حاصل کیا تھا۔
غیر ملکی خبر رساں ادارے سے گفتگو میں معاذ صداقت نے کہا کہ یہ کامیابی ان کے لیے شاہینز پروگرام کے تجربے کا منہ بولتا ثبوت ہے۔
معاذ صداقت نے بتایا کہ ڈومیسٹک کرکٹ میں پرفارم کرنے کے بعد انہیں پاکستان شاہینز کے تین ٹورز کرنے کا موقع ملا جس نے ان کی کھیل کو ایک نیا رخ دیا۔
انہوں نے کہا کہ پاکستان شاہینز کے ساتھ دورہ انگلینڈ میں بیٹنگ اور مختلف کنڈیشنز میں کھیل کر کافی کچھ سیکھا۔
یہ بھی پڑھیں: ایشیا کپ رائزنگ اسٹار فائنل، پاکستان نے سپر اوور میں بنگلہ دیش کو ہرا کر ٹائٹل جیت لیا
معاذ نے مزید کہا کہ آسٹریلیا میں ہونے والے ٹاپ اینڈ ٹی ٹوئنٹی میں کوچز نے انہیں اوپننگ کا موقع دیا جس پر وہ سنچری کرنے میں کامیاب ہوئے۔
انہوں نے یہ بھی بتایا کہ ایشیا کپ رائزنگ اسٹارز سے پہلے خود سے وعدہ کیا تھا کہ وہ اپنی ٹیم کو ٹائٹل جتوائیں گے۔
معاذ صداقت نے ہانگ کانگ سپر سکسز میں حاصل کردہ تجربے کو بھی اپنی کامیابی میں اہم قرار دیتے ہوئے کہا کہ وہ پریشر جو وہاں محسوس کیا، اسی نے ایشیاکپ رائزنگ اسٹار میں مدد دی۔
انہوں نے مزید کہا کہ بطور ایمرجنگ کرکٹر، ڈومیسٹک کرکٹ کے بعد شاہینز کے ساتھ کھیلنے سے کھلاڑی اپنے اسکلز کو مزید نکھار سکتے ہیں اور یہ تجربہ انٹرنیشنل کرکٹ میں کام آئے گا۔
یاد رہے کہ معاذ صداقت اب تک 24 فرسٹ کلاس، 20 لسٹ اے اور 25 ٹی ٹوئنٹی میچز کھیل چکے ہیں۔ اس سال انہوں نے پشاور زلمی کے لیے پی ایس ایل ڈیبیو پر پلیئر آف دی میچ کا ایوارڈ بھی حاصل کیا تھا۔
علاوہ ازیں انہوں نے سال 2022 میں ویسٹ انڈیز انڈر 19 ورلڈکپ میں بھی پاکستان کی نمائندگی کی تھی۔