پاکستان نے (قطر) دوحہ میں ہونے والے ایشین شاٹ گن چیمپیئن شپ میں تاریخ رقم کرتے ہوئے پاک فوج کے لیفٹیننٹ کرنل فرخ ندیم نے تاریخی اعزاز اپنے نام کرلیا۔

چیمپیئن شپ میں نیا عالمی ریکارڈ قائم کرتے ہوئے پاک فوج  کے لیفٹیننٹ کرنل فرخ ندیم نے پہلا گولڈ میڈل جیت لیا جبکہ اس ایونٹ میں ایشیاء کے کل 17 ممالک نے حصہ لیا۔

پاکستان شوٹنگ فیڈریشن کے مطابق انفرادی سطح پر لیفٹیننٹ کرنل فرخ ندیم نے کوالیفائنگ راؤنڈ میں 125 میں سے 119 ہٹ کیے، عالمی چیمپیئن  لیفٹیننٹ کرنل فرخ ندیم نے فائنل مقابلے میں 30 میں سے 27  ہٹ کر کے مخالفین کو حیران کردیا۔

لیفٹیننٹ کرنل فرخ ندیم نے گولڈ میڈل کیساتھ ساتھ چیمپیئن شپ کے نئے فارمیٹ کے تحت نیا عالمی ریکارڈ بھی قائم کر کے تاریخی ریکارڈ اپنے نام کر لیا۔

پاک فوج کے لیفٹیننٹ کرنل فرخ ندیم کی مہارت اور جذبے نے دنیا کے سامنے ایک روشن مثال قائم کردی، ان کی کامیابی اور ان کی مہارت، توجہ اور لگن کو عالمی سطح پر سراہا گیا۔

دوحہ ٹورنامنٹ میں پاکستان کا طلائی تمغہ قومی شوٹنگ کمیونٹی کیلئے حوصلہ افزائی اور پوری قوم کیلئے باعثِ فخر ہے۔