نیوزی لینڈویمنز کرکٹ ٹیم  نے پہلے ون ڈے انٹرنیشنل میں  پاکستان کو 131  رنز سے  شکست دے دی۔

تفصیلات کے مطابق کوئنز ٹاؤن کے جان ڈیوس اوول میں پاکستان ویمنز ٹیم نے ٹاس جیت کر نیوزی لینڈ ویمنز کو بیٹنگ کی دعوت دی ۔

نیوزی لینڈ نے مقررہ 50 اوورز میں 4 وکٹوں کے نقصان پر365 رنز بناڈالے۔

نیوزی لینڈ ویمنز کی اننگز کی خاص بات 36 سالہ  سوزی بیٹس کی سنچری تھی۔ انہوں نے گیارہ چوکوں کی مدد سے108  رنز بنائے۔ یہ ان کی ون ڈے انٹرنیشنل میں 13 ویں سنچری ہے۔

ان کے علاوہ بیزی ڈین ہوٹ نے آٹھ چوکوں کی مدد سے 86 رنز اسکور کیے۔ ایمیلیا کر نے چھ چوکوں کی مدد سے 83 رنز بنائے جبکہ کپتان سوفی ڈیوائن نے جارحانہ انداز میں کھیلتے ہوئے صرف 36 گیندوں پر2 چوکوں اور6 چھکوں کی مدد سے 70 رنز اسکور کیے۔

New Zealand win the first ODI in Queenstown 🏏#NZWvPAKW | #BackOurGirls pic.twitter.com/CXTX393Cta

— Pakistan Cricket (@TheRealPCB) December 12, 2023

پاکستان ویمنز کی طرف سے ام ہانی، نشرہ سندھو اور فاطمہ ثناء نے ایک ایک وکٹ حاصل کی۔

پاکستان ویمنز نے بڑے ہدف کے تعاقب میں پراعتماد آغاز کیا ۔

سدرہ امین اور منیبہ علی نے پہلی وکٹ کی شراکت میں 110 رنز بنائے۔  منیبہ علی  پانچ چوکوں کی مدد سے 44 رنز بناکر آؤٹ ہوئیں۔

سدرہ امین نے عمدہ بیٹنگ کرتے ہوئے  گیارہ چوکوں کی مدد سے 105 رنز اسکور کیے۔ یہ ان کی ون ڈے انٹرنیشنل میں چوتھی سنچری ہے۔

ان دونوں کے بعد دیگر بیٹرز قابل ذکر کارکردگی نہ دکھاسکیں۔صدف شمس 10  بسمہ معروف 14، عالیہ ریاض 14، فاطمہ ثناء 11،ام ہانی 9، عمیمہ سہیل 7، نجیہ علوی 3 اور نشرہ سندھو ایک رن بناپائیں۔

پاکستان ویمنز   ٹیم 49.5 اوورز میں 234 رنز بناکر آل آؤٹ ہوگئی۔

میزبان ٹیم کی جانب سے ایمیلیا کر نے 44  رنز دے کر 3 وکٹیں حاصل کیں۔

دونوں ٹیموں کے درمیان اگلے دو ون ڈے انٹرنیشنل 15 اور 18 دسمبر کو کرائسٹ چرچ میں کھیلے جائیں گے ۔ یہ ون ڈے سیریز آئی سی سی ویمنز چیمپئن شپ کا حصہ ہے۔