دبئی: آئی سی سی نے یو ایس اے نیشنل کرکٹ ٹیم اور ہائی پرفارمنس پروگرام کے لیے مکمل مالی اور انتظامی تعاون کا اعلان کردیا۔

جاری کردہ اعلامیئے کے مطابق انٹرنیشنل کرکٹ کونسل (آئی سی سی) نے اعلان کیا ہے کہ وہ یو ایس اے نیشنل کرکٹ ٹیم اور ہائی پرفارمنس پروگرام کے لیے مکمل مالی اور انتظامی تعاون فراہم کرے گی۔

آئی سی سی نے یہ فیصلہ اس لیے کیا ہےتاکہ کھلاڑیوں کی تیاری متاثر نہ ہو اور قومی ٹیم عالمی مقابلوں میں شرکت کے لیے تیار رہے۔

آئی سی سی نے کہا کہ یو ایس اے کرکٹ کے مالی بحران اور چیپٹر 11 دیوالیہ کارروائی کے باوجود کھلاڑیوں کی تیاری اور تربیت پر کوئی اثر نہیں پڑے گا۔

عالمی کرکٹ کی گورننگ باڈی نے یہ بھی فیصلہ کیا ہے کہ انڈر 19 ورلڈ کپ 2026، ٹی ٹوئنٹی ورلڈ کپ 2026 اور ایل اے 2028 اولمپکس کی تیاری جاری رہے گی۔

آئی سی سی نے تصریح کی کہ وہ یو ایس اے ہائی پرفارمنس پروگرام کے تمام اخراجات اٹھانے کو تیار ہے اور قومی ٹیم کے کھلاڑیوں کی تنخواہیں براہِ راست ادا کرنے کے امکانات پر غور کیا جا رہا ہے۔

آئی سی سی کا کہنا ہے کہ یو ایس اے کرکٹ کی معطلی سے عالمی ایونٹس میں شرکت متاثر نہیں ہوگی۔

مزید برآں، مرد و خواتین قومی ٹیموں کے لیے مشترکہ تربیتی اور کوچنگ پروگرام تیار کیا جائے گا، اور ایل اے 2028 اولمپکس کی تیاری کے لیے آئی سی سی اور یو ایس او پی سی کے درمیان قریبی تعاون جاری رہے گا۔

آئی سی سی نے یہ بھی واضح کیا کہ یو ایس اے میں ڈومیسٹک کرکٹ ایونٹس کی منظوری اب براہِ راست آئی سی سی دے گی۔

اعلامیے کے مطابق معطلی کے دوران ایونٹس کی منظوری کے لیے درخواستیں بھی آئی سی سی کو دی جائیں گی، تاکہ یو ایس اے میں کرکٹ کی شفاف گورننس اور استحکام بحال ہو سکے۔