پاکستان کرکٹ بورڈ (پی سی بی) نے پاکستان اور آسٹریلیا کے درمیان تین میچوں کی ٹی20 سیریز کے آفیشلز کا اعلان کر دیا ہے۔
پاکستان اور آسٹریلیا کے درمیان تین میچوں کی ٹی20 سیریز 29 جنوری، 31 جنوری اور یکم فروری کو قذافی اسٹیڈیم لاہور میں کھیلی جائیں گی۔ تمام میچز شام 4 بجے شروع ہوں گے جبکہ ٹاس 3:30 بجے ہوگا۔
سیریز میں آئی سی سی انٹرنیشنل پینل کے میچ ریفری علی نقوی پلیئنگ کنٹرول ٹیم کے سربراہ کے طور پر خدمات انجام دیں گے۔
مزید پڑھیں: بارش کے باعث پاکستان اور سری لنکا کے درمیان ہونے والا ٹی 20 میچ منسوخ کر دیا گیا
دوسرا میچ علی نقوی کا بطور ریفری 50 واں ٹی20 انٹرنیشنل ہوگا۔ انہوں نے اسی گراؤنڈ پر اپریل 2023 میں اپنے ٹی20 ریفری کیریئر کا آغاز کیا تھا۔
سیریز میں آئی سی سی ایلیٹ پینل کے امپائر احسن رضا پہلے دو میچز میں آن فیلڈ امپائر ہوں گے۔
پہلے میچ میں ان کے ساتھ آئی سی سی ایمرجنگ پینل کے آصف یعقوب آن فیلڈ امپائر کے فرائض انجام دیں گے، جبکہ دوسرے میچ میں ان کے ہمراہ آئی سی سی انٹرنیشنل پینل کے راشد ریاض ہوں گے۔
تیسرے ٹی20 میں راشد ریاض اور آئی سی سی انٹرنیشنل پینل کے ناصر حسین آن فیلڈ ذمہ داریاں نبھائیں گے۔
پہلے میچ میں تھرڈ امپائر ناصر حسین اور فورتھ امپائر راشد ریاض ہوں گے، دوسرے میچ میں آصف یعقوب تھرڈ اور ناصر حسین فورتھ امپائر کے فرائض سر انجام دیں گے، جبکہ تیسرے میچ میں پی سی بی نیشنل ایلیٹ پینل کے طارق رشید اور ذوالفقار جان فورتھ امپائر کی ڈیوٹی کریں گے۔
