مختصر دورانیے کی ویڈیو شیئرنگ ایپ ٹک ٹاک صارفین کے لیے اچھی خبر آگئی ہے۔

ٹک ٹاک نے صارفین کی ذہنی صحت کو بہتر بنانے اور صحت مند ڈیجیٹل عادات کو فروغ دینے کے لیے نیا فیچر Time and Well-Being لانچ کردیا ہے، اس فیچر کا مقصد حد سے زیادہ اسکرولنگ کو کم کرنا، بہتر نیند کو فروغ دینا اور روزمرہ کی مثبت سرگرمیوں کو اپنانے میں مدد فراہم کرنا ہے۔

نیا فیچر صارفین کو مختلف انٹرایکٹو ٹولز، ویلنیس سرگرمیوں اور ریوارڈز کے ذریعے متوازن اور صحت مند طرزِ زندگی کی طرف مائل کرتا ہے۔

ٹک ٹاک کے مطابق یہ اپ ڈیٹ ذہنی سکون، مائنڈفلنیس، پروڈکٹیویٹی اور محفوظ ڈیجیٹل استعمال کو مزید بہتر بنانے کے لیے تیار کی گئی ہے۔

ٹک ٹاک کے نئے فیچر میں صارفین کے لیے متعدد اہم سہولیات شامل کی گئی ہیں۔ افرمیشن جرنل کے ذریعے صارفین تقریباً 120 ڈیجیٹل کارڈز کی مدد سے اپنے روزمرہ اہداف اور مثبت ارادوں کا تعین کر سکتے ہیں۔

 اس کے علاوہ ویوز، بارش اور وائٹ نُوائز جیسی سُدھاؤ دینے والی آوازیں فراہم کی گئی ہیں جو ذہنی سکون اور بہتر نیند میں مدد دیتی ہیں۔

مزید پڑھیں: ٹک ٹاک نے امریکا میں اپنے پہلے ٹک ٹاک ایوارڈز شو کے انعقاد کا اعلان کردیا

 فیچر میں گائیڈڈ بریتھنگ ایکسرسائزز بھی شامل ہیں، جو تناؤ کم کرنے اور توجہ بڑھانے میں معاون ثابت ہوتی ہیں۔

ٹک ٹاک نے Well-Being Missions بھی متعارف کرائے ہیں، جن کے تحت صحت مند عادات اپنانے پر صارفین کو انعامات ملیں گے۔ ڈوم اسکرولنگ مشن صارفین کو زیادہ اسکرولنگ چھوڑنے کی ترغیب دیتا ہے اور مقررہ اسکرین ٹائم پر عمل کرنے پر روزانہ کا اسکرین ٹائم بیج دیا جاتا ہے۔

اسی طرح سلیپ آورز مشن درست نیند کے اوقات اپنانے، رات دیر تک اسکرولنگ سے گریز کرنے اور مناسب آرام لینے کی حوصلہ افزائی کرتا ہے، جس سے صارفین اپنا Well-Being Tree بھی بڑھاسکتے ہیں۔

یہ مشنز پہلے سے موجود اسکرین ٹائم فیچر کا حصہ ہیں، جو ابتدا میں صرف نوعمر صارفین تک محدود تھا، تاہم اب ہر عمر کے ٹک ٹاک صارفین کے لیے دستیاب ہے۔