پاکستان ٹیلی کمیونیکیشن اتھارٹی (پی ٹی اے) نے بیرونِ ملک سے درآمد کیے جانے والے موبائل فونز پر عائد بھاری ٹیکسوں میں کمی کی حمایت کر دی ہے، جس کے بعد 2026 میں پاکستان میں موبائل فونز کی قیمتوں میں نمایاں کمی کی امید ہے۔

پی ٹی اے حکام کا کہنا ہے کہ موجودہ ٹیکس پالیسی کی وجہ سے عوام کی بڑی تعداد جدید اسمارٹ فونز خریدنے سے محروم ہو چکی ہے، اور عوامی تشویش میں مسلسل اضافہ ہو رہا ہے۔

حکام کے مطابق پی ٹی اے نے حکومت کو ایسی سفارشات ارسال کی ہیں جن میں کہا گیا ہے کہ موبائل فونز اب صرف ایک لگژری اشیاء نہیں رہے، بلکہ تعلیم، کاروبار، ڈیجیٹل بینکنگ اور آن لائن روزگار کے لیے یہ ایک بنیادی ضرورت بن چکے ہیں۔

یہ بھی پڑھیں: پی ٹی اے اور میٹا کا مشترکہ قدم، پاکستان میں انسٹاگرام پر کم عمر صارفین کیلیے فیچر متعارف

پی ٹی اے کا مزید کہنا ہے کہ درآمدی موبائل فونز پر بھاری ٹیکسوں نے عام صارفین کے لیے جدید ٹیکنالوجی تک رسائی مشکل بنا دی ہے۔ حکام نے یہ بھی کہا کہ بیرونِ ملک مقیم پاکستانیوں کو اپنے استعمال کے لیے موبائل فون لانے میں شدید مشکلات کا سامنا ہے، کیونکہ ایئرپورٹس پر فون رجسٹریشن کا عمل مہنگا اور پیچیدہ ہو چکا ہے، جس پر اوورسیز پاکستانیوں کی جانب سے بارہا شکایات موصول ہو چکی ہیں۔

اتھارٹی کے مطابق، اگر ٹیکسوں میں کمی کی جاتی ہے تو نہ صرف عوام کو ریلیف ملے گا بلکہ موبائل فونز کی قانونی درآمد میں بھی اضافہ ہوگا۔

ماہرین کے مطابق، بھاری ٹیکسوں کی وجہ سے پاکستان میں موبائل فونز کی قیمتیں خطے کے دیگر ممالک کے مقابلے میں زیادہ ہیں، جس کی وجہ سے اسمگلنگ اور غیر قانونی فونز کا استعمال بھی بڑھ رہا ہے۔

ماہرین کا یہ بھی کہنا ہے کہ ٹیکسوں میں کمی سے مارکیٹ میں مقابلہ بڑھے گا اور حکومت کو طویل المدتی بنیادوں پر ریونیو میں فائدہ ہو سکتا ہے۔ پی ٹی اے حکام نے امید ظاہر کی ہے کہ وفاقی حکومت آئندہ مالی سال کے بجٹ یا 2026 کی پالیسی میں موبائل فونز پر عائد ٹیکسوں پر نظرثانی کرے گی۔

اگر پی ٹی اے کی سفارشات منظور ہو گئیں، تو پاکستان میں موبائل فونز کی قیمتوں میں کمی آئے گی، جس سے صارفین کو جدید موبائل فونز خریدنے میں آسانی ہوگی اور ’’ڈیجیٹل پاکستان‘‘ کے خواب کو حقیقت میں بدلنے میں مدد ملے گی۔