مصنوعی ذہانت سے چلنے والے چیٹ بوٹس تیزی سے پیشہ ورانہ معلومات کے لیے لنکڈ ان پر انحصار کررہے ہیں۔

مارکیٹنگ پلیٹ فارم پروفاؤنڈ کے تازہ ترین اعدادوشمار کے مطابق چیٹ جی پی ٹی، کلاڈ اور جیمنی جیسے چیٹ بوٹس میں پیشہ ورانہ تلاش کے سوالات کے جوابات کے لیے لنکڈ ان کا سب سے زیادہ حوالہ دیا جا رہا ہے۔

اعدادوشمار بتاتے ہیں کہ نومبر 2025 سے اب تک چیٹ بوٹس میں لنکڈ ان کے حوالے دینے کی شرح میں دوگنا اضافہ ہوا ہے۔ پیشہ ورانہ تلاش کے سوالات میں اب لنکڈ ان سب سے زیادہ حوالہ دیا جانے والا ڈومین بن گیا ہے۔

چیٹ جی پی ٹی میں لنکڈ ان کے تمام حوالوں کی تقسیم دیکھیں تو 35 فیصد حوالے پوسٹس، طویل مضامین اور نیوز لیٹرز سے لیے جاتے ہیں جبکہ 14.5 فیصد حوالے صارفین کے پروفائلز سے لیے جاتے ہیں۔

مشینوں کی نظر میں کیسے آئیں؟

لنکڈ ان انٹیلیجنس پلیٹ فارم لیلی پاتھ کے شریک بانی ایرن لانوٹی کا کہنا ہے کہ پیشہ ورانہ مرئیت کا تصور تیزی سے تبدیل ہو رہا ہے۔ اب یہ صرف اتنا نہیں کہ آپ دوسرے لوگوں کے سامنے کیسے نظر آتے ہیں بلکہ مشینیں آپ کو کیسے دیکھتی ہیں یہ بھی اتنا ہی اہم ہو گیا ہے۔

ان کا مزید کہنا تھا کہ اگر مصنوعی ذہانت کے نظام پیشہ ورانہ معلومات کے لیے لنکڈ ان کو بنیادی ماخذ کے طور پر استعمال کر رہے ہیں تو پروفائل کی وضاحت اس بات کا تعین کر سکتی ہے کہ کسی ماہر کو سامنے لایا جائے یا نظر انداز کر دیا جائے۔

دوسرے پلیٹ فارمز کا کردار

ریڈٹ، ویکیپیڈیا اور یوٹیوب جیسے پلیٹ فارمز بھی مصنوعی ذہانت کے جوابات میں نمایاں ہو رہے ہیں۔ ان پلیٹ فارمز کی خاصیت یہ ہے کہ یہ حقیقی صارفین کی گفتگو اور بصیرت فراہم کرتے ہیں جسے مصنوعی ذہانت کے ماڈلز سیکھتے ہیں۔

ریڈٹ پر صارفین کی گفتگو اب چیٹ بوٹس کے جوابات میں نظر آنے لگی ہے جس کی وجہ سے کئی برانڈز اس پلیٹ فارم پر اپنی موجودگی بڑھا رہے ہیں۔

پرائیویسی کا مسئلہ

لنکڈ ان کے ترجمان کے مطابق مصنوعی ذہانت کے سرچ ٹولز صرف وہی معلومات استعمال کر سکتے ہیں جو صارفین نے عوامی سطح پر رکھی ہیں۔ کمپنی صارفین کے ڈیٹا کو غیر مجاز استعمال سے بچانے کے لیے اقدامات کر رہی ہے۔

نئے دور کی تیاری

ماہرین کا کہنا ہے کہ مصنوعی ذہانت کے دور میں ہر پیشہ ور فرد اور کمپنی کو اپنی آن لائن موجودگی پر نظر ثانی کرنی ہوگی۔ وہ لوگ جو ان پلیٹ فارمز پر بامعنی مواد فراہم کرتے ہیں ان کے چیٹ بوٹس میں نمایاں ہونے کے امکانات زیادہ ہیں۔