سولر پینل استعمال کرنے کے خواہشمند افراد کیلئے اچھی خبر آگئی ہے۔

تفصیلات کے مطابق برطانوی سائنسدانوں نے نئی قسم کا سولر پینل تیار کیا ہے جو سورج کی روشنی کو زیادہ مقدارمیں جذب کرنے کی صلاحیت رکھتا ہے۔

نیا سولر پینل پتے کی طرح نظر آتا ہے، یہی وجہ ہے کہ اسے سولر لیف کا نام دیا گیا ہے، سولر لیف ابھی کانسیپٹ مرحلے سے گزر رہا ہے۔

اس حوالے سے ایک تحقیق کی گئی ہے جس میں بتایا گیا ہے کہ یہ تھرمل انرجی استعمال کر سکتا ہے جبکہ اس کے لیے عام سولر پینلز کے مقابلے میں سورج کی زیادہ روشنی جذب کرنا بھی ممکن ہوگا۔

محققین کا کہنا ہے کہ اس نئی ٹیکنالوجی کے لیے پودوں کے بخارات کے اخراج کے نظام کو مدنظر رکھا گیا ہے، جس کے ذریعے پودے اپنے پتوں سے زیادہ مقدار میں پانی جڑوں میں منتقل کرکے خود کو ٹھنڈا رکھتے ہیں۔

اس نظام کی نقل پر مبنی سولر لیف کو بھی خود کو ٹھنڈا رکھنے میں مدد ملے گی اور وہ سورج کی روشنی کو زیادہ جذب کرسکے گا جس سے زیادہ بجلی بنانے میں مدد ملے گی۔

عام سولر پینلز کی افادیت وقت گزرنے کے ساتھ گھٹ جاتی ہے مگر محققین کا ماننا ہے کہ سولر لیف سورج کی 13.2 فیصد زیادہ توانائی اپنے اندر جمع کرسکے گا۔

اس کے ساتھ ساتھ یہ سولر پینل اپنے اندر جمع ہونے والی حرارت کو تازہ پانی اور تھرمل انرجی کی تیاری کے لیے بھی استعمال کرسکے گا۔فی الحال یہ سولر پینل کانسیپٹ مرحلے سے گزر رہا ہے اور ابھی واضح نہیں کہ حقیقی دنیا میں کب تک یہ ٹیکنالوجی دستیاب ہوگی۔