بھارتی وزیر اعلیٰ پنجاب امریندر سنگھ نے   ایک دلچسپ انکشاف کیا ہے کہ ان کےوزیر اعظم پاکستان  عمران خان  اور ان کے خاندان کے ساتھ دہائیوں پرانے تعلقات ہیں۔

بھارتی میڈیا  نے امریندر سنگھ کے آفس  کی جانب سے جاری بیان کا حوالہ دیتے ہوئے کہا کہ کرتارپور راہداری کے افتتاح کے موقع پر  عمران خان اورامریندر سنگھ نے زیر پوائنٹ سے گردوارے تک بس میں ساتھ سفر کیا۔مختصر سے اس سفر میں کرکٹ کے موضوع پر عمران خان اور امریندر سنگھ کے درمیان کچھ دلچسپ باتیں ہوئیں جس دوران امریندر سنگھ نے یہ انکشاف کیا کہ وہ عمران خان اور ان کے خاندان کو پہلے سے جانتے ہیں ۔

آفس کے بیان کے مطابق امریندر سنگھ نے بتایا کہ عمران خان کے خالوجہانگیر خان  نے امریندر سنگھ کے والد  مہاراجہ یودوندر سنگھ کی کپتانی میں 1934-1935 کے دوران  پٹیالہ کرکٹ ٹیم کی نمائندگی کی۔ جسے  سن کر عمران خان کی جانب سے بھی حیرت کا اظہار کیا گیا۔جہانگیر خان عمران خان کی خالہ مبارک کے شوہر تھے۔انہوں نے اپنا پہلا ٹیسٹ 25 جون 1932ء کو لارڈز کے میدان میں کھیلا تھا۔

بھارتی وزیر اعلیٰ پنجاب کی جانب سے کرتارپور کے ذریعے پاکستان اور بھارت کےدرمیان تعلقات میں بہتری  کیلئے امید کا اظہاربھی کیا گیا ہے۔انہوں نے کہا کہ یہ راہدری ، دونوں ممالک کے درمیان کرکٹ جیسا مضبوط تعلق پیدا کرنے میں مفید ثابت ہوگی۔

واضح رہے کہ 9 نومبر 2019 کو وزیر اعظم عمران خان  نے کرتارپور راہداری کا افتتاح کیا تھا۔ دنیا بھر کے 68 ممالک سے سکھ یاتریوں کی بڑی تعداد نے افتتاحی تقریب میں شرکت کی، سابق بھارتی وزیراعظم منموہن سنگھ، نوجوت سدھو، بھارتی اداکار سنی دیول بھی تقریب میں شریک ہوئے تھے۔