کورونا کی وجہ سے  دنیا بھر میں صرف انسانی جان کا  نقصان نہیں ہوا ہے بلکہ پوری دنیا ایک بڑے معاشی بحران سے بھی دو چار ہے۔

کورونا  وباء کے دوران ناجانے کتنے ہی افراد بےروزگار بھی ہوئے اور ہار مان لی لیکن بہت سے لوگوں نے ان سب مشکلات میں بھی حالات کا سامنا کیا اور کامیاب رہے۔

ایسی ہی ایک کہانی کے کردار کے  متعلق ہم آپ کو بتائیں گے جنہوں نے نوکری چھوٹ جانے کے بعد روزگار کی حاطر بہت منت سماجت  کی لیکن آخر میں اپنی ہوم میڈ بریانی کا کاروبار شروع کیا اور ماشاء اللہ آج وہ کامیاب ہیں۔

ان کا نام محمد عمر کمال ہے جو کہ لمز اور کینیڈا کی میگل یونی ورسٹی سے انٹر پرائز مینجمنٹ کی ٹریننگ حاصل کرنے والے اور تدریس کے شعبے میں منسلک ہیں۔

آنکھوں میں آنسو بھر عمر کمال صاحب کا یہ کہنا تھا کہ جب انہیں اس بات کا احساس ہوا کہ رزق کا وعدہ تو اللہ نے کیا تھا وہ بندوں سے مانگ کر گناہ گار ہو رہے ہیں یہ محسوس ہونے کے بعد تین ماہ تک انہوں نے رو رو کر اللہ سے اپنے گناہ کی معافی طلب کرنی شروع کر دی۔

 بے روزگاری اور نوکری کی تلاش کے بعد انہوں نے اور ان کی بیوی نے یہ فیصلہ کیا کہ اب ایک ایسا کام شروع کیا جائے جو کہ اپنے بل بوتے پر شروع کیا جائے جس میں کسی دوسرے پر انحصار نہ ہو۔

اس دوران ان کی بیگم لبنیٰ جو کہ خود بھی تدریس کے شعبے سے منسلک ہونے کے ساتھ ساتھ ایک ماہر شیف بھی تھیں انہوں نے گھر پر بریانی بنا کر بیچنے کا مشورہ دیا جس کے بعد  ان کی بیگم نے ان کو بریانی بنا کر ڈبوں میں پیک کر کے بیچنے کے لیے دی۔

اس حوالے سے عمر کمال صاحب کا کہنا ہے کہ شروع میں پندرہ ڈبے بنا کر جب وہ بیچنے کے لیے گئے تو یہ ان کی زندگی کا سب سے مشکل مرحلہ تھا کہ وہ کس طرح آواز لگا کر بریانی بیچنا شروع کریں۔

مگر پھر ان کے اندر موجود عمر کمال نے ان کو ایک چپیڑ لگائی کہ ابھی تو تم اللہ تعالیٰ سے معافی مانگ کر اور دنیا کے لوگوں کو چھوڑ کر صحیح جگہ پر پہنچے ہو اور ایک بار پھر راستے سے بھٹک رہے ہو
اس کے بعد ان کا کہنا تھا کہ گاڑی سے دوبارہ نکلا اور اس کے بعد سے آج تک ہوم میڈ بریانی ہوم میڈ بریانی کی آواز لگانی بند نہیں کی۔

اب ان کا ہوم میڈ بریانی کا کاروبار دن بدن ترقی کرتا جا رہا ہے اور ان کی بریانی اسلام آباد کے لوگوں کی پسند بنتی جا رہی ہے اس وجہ سے ان کا ارادہ ہے کہ وہ ہوم میڈ بریانی کا ایک ریستوران شروع کریں گے اور اپنے کاروبار کو ترقی دیں گے۔