آج ہم آپ کو 5 ایسے پودوں کے بارے میں بتائیں گے جو گرمی کے موسم میں آپ کی بڑی مشکل آسان کر دیں گے۔

گرمی کے موسم میں اکثر لوگ ٹھنڈی ہوا کے جھونکے لینے کے لئے چھت اور بالکنی میں جاتے ہیں لیکن وہاں پر مچھر بھی ہوتا ہے جو کئی بیماریوں کا باعث بنتا ہے۔

آج ہم آپ کو چند ایسے پودوں کے بارے میں بتائیں گے جو گھر کی فضا کو ٹھنڈا اور معطر رکھنے کے علاوہ مچھروں سے بھی پاک رکھتے ہیں۔

لیمن گراس

لیمن گراس کا پودا پاکستان کی آب و ہوا میں خوب پھلتا پھولتا ہے، جہاں اس کی چائے وزن میں کمی کرنے اور صحت کے بہت سے مسائل حل کرنے میں کارآمد ہے وہیں اس کے پودوں سے خارج ہونے والی خوشبو مچھروں کو ناگوار گزرتی ہے اور مچھر اس جگہ سے دور رہنے پر مجبور ہوجاتے ہیں جہاں یہ پودا موجود ہو۔

لہسن

لہسن ڈالے بغیر کھانا مکمل نہیں ہوتا۔ بہت سے فائدوں والی یہ سبزی بھی مچھروں کی دشمن ہے۔ مچھر ہوں یا دوسرے کیڑے مکوڑے لہسن کی بو سے دور بھاگتے ہیں۔

تلسی

تلسی کے پتوں کی خوشبو تیز اور کسی قدر چبھتی ہوئی ہوتی ہے البتہ یہ بو مچھروں کو بھگانے میں مددگار ہوتی ہے۔ تلسی کا پودا جس جگہ رکھا جائے اس سے کافی دور تک مچھر، مکھی اور کیڑے مکوڑے نہیں آتے۔

روز میری

روزمیری ایسا پودا ہے جو آپ کو تنگ کرنے والے حشرات الارض سے بچاتا ہے، اس کے علاوہ پودے جہاں موجود ہوں اس جگہ کا درجہ حرارت باقی جگہوں کی نسبت کم ہوجاتا ہے۔

پودینہ

پودینہ کھانے میں ذائقہ اور صحت کو فائدہ پہنچانے کے ساتھ کیڑے مکوڑوں اور مکھی مچھروں کو بھی دور رکھتا ہے۔ پودینے کا پودا ٹھنڈا ہوتا ہے۔