جاپان کے شہر اِچیکاوا کے چڑیا گھر میں ایک ننھا جاپانی بندر اُس وقت دنیا بھر کی توجہ کا مرکز بن گیا جب اس کی ویڈیوز منظرِ عام پر آئیں جن میں وہ اپنی ماں کے بجائے ایک نرم کھلونے کو سینے سے لگائے پھرتا دکھائی دیا۔
اس بندر کے بچے کا نام پنچ ہے جس کو پیدائش کے فوراً بعد گزشتہ سال جولائی میں اس کی حقیقی ماں نے قبول نہیں کیا تھا۔ دیکھ بھال کرنے والوں نے اسے تسلی دینے کے لیے اورنگ اُتان نما نرم کھلونا دے دیا جسے بعد میں ’’اورا ماما‘‘ کا نام دیا گیا۔
کئی ماہ تک پنچ کو شاذ و نادر ہی اس کھلونے کے بغیر دیکھا گیا ہو جب کہ اس کی دل کو چھو لینے والی ویڈیوز نے دنیا بھر سے ہمدردی سمیٹی اور وہ توجہ کا مرکز بن گیا۔
パンチは少しずつ群れのサル達との交流を深めています！
毛づくろいされたり、ちょっかいをかけてみたり、怒られたりと毎日色んな経験をして、サルとして群れで暮らすための生き方を日々学んでいます！#市川市動植物園#ニホンザル#パンチ #がんばれパンチ#市川ファン pic.twitter.com/Ds0NT7FKFg— 市川市動植物園（公式） (@ichikawa_zoo) February 6, 2026
اب چڑیا گھر انتظامیہ کا کہنا ہے کہ پنچ آہستہ آہستہ دوسرے بندروں کے ساتھ گھلنا ملنا شروع ہوگیا ہے۔ ابتدا میں اس کے لیے جھنڈ میں واپس جانا مشکل تھا لیکن حالیہ دنوں میں مثبت تبدیلی دیکھی گئی ہے۔
دیکھ بھال کرنے والوں نے بتایا کہ ایک دوسرے بندر نے اس کی صفائی کی جو بندروں کی سماجی زندگی میں اعتماد اور قبولیت کی اہم علامت سمجھی جاتی ہے۔
مزید ویڈیوز میں پنچ کو دوسرے کم عمر بندروں کے ساتھ کھیلتے اور ان کی پیٹھ پر چڑھتے دیکھا گیا۔ ایک موقع پر ایک بڑے بندر کو اسے بانہوں میں لیتے ہوئے بھی دیکھا گیا جسے مبصرین نے اس بات کی علامت قرار دیا کہ پنچ اب تنہا نہیں رہا۔
چڑیا گھر کے ایک نگران کا کہنا ہے کہ پنچ ذہنی طور پر مضبوط ہے اور ڈانٹ پڑنے کے بعد بھی جلد سنبھل جاتا ہے۔ پہلے اس کے ایک نگہبان نے بتایا تھا کہ نرم کھلونے کی ساخت اور شکل نے اسے ماں جیسا احساس دیا اور وہ اس کے لیے متبادل ماں کا کردار ادا کرتا رہا۔
واضح رہے کہ پنچ کی جدوجہد اور حوصلے نے لاکھوں دلوں کو چھولیا ہے اور اب اس کی نئی شروعات کو امید کی علامت سمجھا جارہا ہے۔
