خلیجی ریاستوں میں بارش برسانے والا سسٹم اب پاکستان میں داخل ہو گیا ہے۔

اس حوالے سے چیف میٹرولوجسٹ کا کہنا ہے کہ یہ سسٹم خلیجی ریاستوں میں تیز بارشوں کا باعث بنا تھا، ان کے مطابق سسٹم مکران کے ساحلی علاقوں میں تیز بارشوں کا باعث بن رہا ہے۔

انہوں نے کہا کہ بلوچستان میں تیز بارشیں متوقع ہیں، اس سسٹم کے تحت بارشوں میں بجلی گرنے کے واقعات بھی ہو سکتے ہیں۔

چیف میٹرولوجسٹ کا کہنا ہے کہ آج شام سے سسٹم کے اثرات کراچی اور سندھ پر ظاہر ہونا شروع ہوں گے، یہ اسپیل 3 سے 4 دن ملک میں رہے گا۔

این ڈی ایم اے کا کہنا ہے کہ پاکستان بھر میں 17 سے 22 اپریل کے دوران بارش، آندھی اور ژالہ باری کی توقع ہے، پہلے اسپیل کے دوران پنجاب میں 18 سے 19 اپریل بارش اور آندھی کا امکان ہے۔

بلوچستان میں 17 سے 19 اپریل، سندھ میں 18 سے 19 اپریل بارش اور ژالہ باری جبکہ خیبرپختونخوا میں 17 سے 21 اپریل تک بارشیں ہونے کی توقع ہے۔ آزاد کشمیر اور گلگت میں 18 سے 22 اپریل بارش، آندھی اور ژالہ باری کا امکان ظاہر کیا گیا ہے۔

ترجمان کا کہنا ہے کہ ملک بھر میں بارشوں کا دوسرا اسپیل 25 اپریل سے شروع ہو کر 29 اپریل تک رہے گا اس میں بارش اور ژالہ باری ہونے کا امکان ہے۔

چیف میٹرولوجسٹ کا کہنا ہے کہ بارش کے اس سسٹم کے تحت کراچی میں تیز بارش کا امکان ہے، کل سندھ بھر میں بارش متوقع ہو گی، کراچی میں خلیجی ریاستوں جیسی طوفانی بارش کا امکان نہیں ہے۔