محکمہ موسمیات نے ملک کے مغربی اور بالائی علاقوں میں 20 سے 22 دسمبر کے دوران بارش اور پہاڑوں پر برفباری کی پیش گوئی کردی ہے۔
محکمہ موسمیات کے مطابق 19 دسمبر کو بلوچستان میں داخل ہونے والا مغربی ہواؤں کا سلسلہ 20 دسمبر کو ملک کے بالائی علاقوں کو بھی اپنی لپیٹ میں لے لے گا۔
19 دسمبر کی شام سے 20 دسمبر کے دوران بلوچستان کے مختلف علاقوں میں بارش جبکہ پہاڑوں پر برفباری کا امکان ہے۔
کوئٹہ، زیارت، چمن، قلعہ عبداللہ، قلعہ سیف اللہ، نوشکی، ہرنائی، ژوب، موسیٰ خیل، تربت اور زیارت میں بارش اور برفباری کی توقع ہے جبکہ کیچ، گوادر، جیوانی اور لسبیلہ میں ہلکی بارش ہوسکتی ہے۔
خیبرپختونخوا کے علاقوں چترال، دیر، سوات، کوہستان، شانگلہ، ایبٹ آباد، ہری پور اور مانسہرہ میں بارش اور پہاڑوں پر برفباری کا امکان ہے۔
اس کے علاوہ بونیر، باجوڑ، مہمند، خیبر، اورکزئی، کرم اور وزیرستان میں وقفے وقفے سے بارش جبکہ پشاور، چارسدہ، نوشہرہ، صوابی، بنوں، کرک، ڈی آئی خان، ٹانک اور کوہاٹ میں تیز ہواؤں اور گرج چمک کے ساتھ بارش کی پیشگوئی کی گئی ہے۔
گلگت بلتستان میں 20 دسمبر کی رات سے 23 دسمبر کی صبح تک وقفے وقفے سے بارش اور درمیانے درجے کی برفباری کا امکان ہے۔ دیامر، غذر، سکردو، ہنزہ، گلگت، گانچھے اور شگر میں بارش اور برفباری متوقع ہے جبکہ بعض مقامات پر شدید برفباری بھی ہوسکتی ہے۔
کشمیر میں وادی نیلم، مظفرآباد، پونچھ اور ہٹیاں بالا میں بارش اور پہاڑوں پر برفباری کا امکان ہے جبکہ باغ، حویلی، سدھنوتی، کوٹلی، بھمبر اور میرپور میں تیز ہواؤں اور گرج چمک کے ساتھ بارش متوقع ہے۔
مزید پڑھیں: کراچی میں سردی کی شدت میں اضافہ کب ہوگا؟ محکمہ موسمیات اہم پیشگوئی
محکمہ موسمیات کے مطابق پنجاب اور اسلام آباد میں بھی 20 دسمبر کی شام سے بارش کا امکان ہے۔ راولپنڈی، خطہ پوٹھوہار، میانوالی، بھکر، نورپور تھل اور لیہ میں بارش متوقع ہے جبکہ مری اور گلیات میں 20 سے 21 دسمبر کے دوران بارش اور برفباری ہو سکتی ہے۔
سرگودھا، خوشاب، فیصل آباد، حافظ آباد اور گوجرانوالہ میں مطلع ابر آلود رہنے جبکہ گجرات، سیالکوٹ، نارووال، لاہور، شیخوپورہ، جھنگ، ڈی جی خان اور ٹوبہ ٹیک سنگھ میں بوندا باندی کی توقع ہے۔
علاوہ ازیں سندھ کے بیشتر علاقوں میں 19 اور 20 دسمبر کے دوران موسم جزوی طور پر ابر آلود رہے گا۔
محکمہ موسمیات نے خبردار کیا ہے کہ 20 سے 22 دسمبر کے دوران برفباری کے باعث ناران، کاغان، سوات، دیر اور کوہستان سمیت متعدد پہاڑی علاقوں میں سڑکیں بند ہونے کا خدشہ ہے جبکہ مری، گلیات، وادی نیلم، باغ، پونچھ، استور، ہنزہ اور اسکردو میں ٹریفک کی روانی متاثر ہوسکتی ہے۔
