امریکا میں پاکستانی سفیر اسد مجید نے مقبوضہ وادی میں آزاد مبصرین کو بھیجنے اور بھارت سے کشمیر میں کرفیو ہٹانے کا مطالبہ کیا ہے۔

تفصیلات کے مطابق واشنگٹن میں بل رن پارک میں یوم آزادی پاکستان فیسٹول کا انعقاد ہوا جس میں بڑی تعداد میں پاکستانی نژاد امریکیوں نے شرکت کی، شرکا نے بھارتی مظالم کا سامنا کرنے والے کشمیری بھائیوں،بہنوں سے اظہار یکجہتی کی۔ 

پاکستانی سفیر نے کہا کہ مقبوضہ کشمیرکی صورت حال ایک سنگین انسانی المیے میں بدل رہی ہے، بھارتی رویے سے پیدا شدہ حالات امن اور سیکورٹی کے لیے بڑا خطرہ ہیں، آزاد مبصرین کو مقبوضہ وادی میں بھیجا جائے، بھارت کو حالیہ اقدام واپس لینے پر مجبور کیا جائے۔

پاکستانی سفیر کا کہنا تھا کہ امریکی صدرٹرمپ کو بھی کشمیر کی صورتحال پر تشویش ہے، ٹرمپ نے تین مرتبہ کشمیر پر کردار ادا کرنے کی پیشکش کی ،مگر بھارت نے اپنی ہٹ دھرمی دکھائی۔

واضح رہے کہ گزشتہ ہفتے امریکا میں تعینات پاکستان کے سفیرڈاکٹر اسد مجید خان نے امریکی پالیسی ساز اداروں کو کشمیر کی صورت حال پر بریفنگ دی۔ تھی پاکستانی سفیر نے امریکی نمائندوں کو مقبوضہ کشمیر پر پاکستانی مؤقف سے آگاہ کیا تھا۔

ڈاکٹراسد مجید خان کا کہنا تھا کہ مقبوضہ کشمیر کی عوام بھارتی ظلم وستم کا شکار ہے، مسئلے کے حل کے لیے عالمی قوتوں، اداروں کو کردار ادا کرنا ہوگا۔ انہوں نے کہا کہ اقوام متحدہ کو بھارت کیخلاف سخت کارروائی کرنا ہوگی۔