ترک صدر رجب طیب اردوان نے کہا ہے کہ دنیا کو کشمیریوں کے دکھ درد کے بارے میں جاننے کی ضرورت ہے۔

تفصیلات کے مطا بق ترکی کے دارلحکومت استنبول میں ترکی کی جانب سے پاکستان کو چار تباہ کن بحری جہازوں کی فراہمی کی تقریب منعقد کی گئی، جن میں سے 2 بحری جہاز پاکستان اور2ترکی میں تیار ہوں گے،تقریب سے خطاب کرتے ہوئے ترک صدر نے کہا کہ پاک ترک تعلقات برادرانہ اور مثالی ہیں اور دونوں ممالک کے درمیان دفاعی شعبے میں تعاون کے فروغ کے وسیع مواقع موجود ہیں۔ 

طیب رجب اردوان نے مسئلہ کشمیر اٹھاتے رہنے اور کشمیری عوام کی پریشانیوں کو اجاگر کرنے کے عزم کا اظہار کرتے ہوئے کہا کہ دنیا کو کشمیریوں کے دکھ درد کے بارے میں جاننے کی ضرورت ہے، کشمیریوں کے حق میں آواز اٹھاتا رہوں گا۔

 ترک صدر نے کہا کہ 80 لاکھ سے زیادہ کشمیری بڑی ہمت کے ساتھ قابض افواج کی بربریت کا سامنا کرتے ہوئے اپنی ہی سرزمین میں کھلی فضا میں قید ہیں۔

چیف آف نیول سٹاف ایڈمرل ظفر محمو د عباسی نے بھی استنبول میں منعقدہ تقریب میں شرکت کی  اور اس منصوبے کو پاک ترکی بھائی چارے کی ایک اور مثال قرار دیا، انہوں نے مقبوضہ جموں و کشمیر کی حالیہ صورتحال کے بارے میں مہمانوں کو تازہ ترین حالات سے بھی آگاہ کیا۔

ایڈمرل ظفر محمو د عباسی نے ترک صدر کا نیو یارک میں اقوام متحدہ کی جنرل اسمبلی میں اپنے خطاب میں مسئلہ کشمیر کو اٹھانے پر انکا شکریہ ادا کرتے ہوئے کہا کہ پاکستان اور کشمیری عوام مستقل حمایت کے لئے ترکی کے مقروض ہیں۔