مقبوضہ کشمیرمیں اسی لاکھ کشمیریوں پر زندگی تنگ کرنے والا  اور جنگ کی بھڑکیاں ہانکنے والا  بھارت بھوک اور افلاس والے ممالک کی فہرست میں  جنوبی ایشیا میں پہلے نمبر پر آگیا ۔

تفصیلات  کے مطابق دنیا کی سب سے بڑی جمہوریت کے دعویدار بھارت کی سرکاراپنے ہی باسیوں کا پیٹ بھرنے میں ناکام ہوچکی ہے۔

انتہا پسندی کا راگ الاپنے اور نہتے کشمیریوں کا کھانا پانی بند کرنے والے بھارت میں بھوک اور افلاس کے ڈیرے ہیں ۔

بھوک افلاس کی فہرست (گلوبل ہنگر لسٹ ) میں بھارت جنوبی ایشیا میں پہلے نمبر پر آگیا ہے۔ بھوک کا شکار ممالک کی عالمی درجہ بندی میں جنگی جنون میں مبتلا پڑوسی ملک بھارت تنزلی کے بعد 102 پر پہنچ گیا ہے۔جبکہ  بھارت  2010 میں 95 نمبر پر تھا۔

جنوبی ایشیا کے دوسرے ممالک میں سری لنکا 66ویں، نیپال 73ویں، بنگلہ دیش 88ویں، اور افغانستان 108ویں نمبر پر ہے۔ گلوبل انڈیکس میں نیچے ہونے کا مطلب ہے کہ اس ملک کی آبادی کو ضروری خوراک نہیں مل رہی، بچوں کی اموات کی شرح زیادہ ہے، بچوں کا وزن کم ہے اور وہ خوراک کی کمی کا شکارہیں۔

آئرش ایڈ ایجنسی کنسرن ورلڈ وائڈ اور جرمنی کی تنظیم ویلٹ ہنگر ہائلف کی جانب سے مشترکہ طور پر تیار کی گئی  رپورٹ میں بھارت میں بھوک کی سطح کو  سنگین  قرار دیا گیا۔

جبکہ پاکستان  میں صورتحال ماضی کے مقابلے میں بہتر ہوئی ہے۔فہرست کے مطابق چودہ درجے ترقی کے بعد  117 ممالک میں 94 نمبر پر آگیا ہے۔

رپورٹ میں مزید یہ بھی بتایا گیا ہے کہ بچوں کی نشونما میں کمی کا تناسب سب سے زیادہ جنوبی ایشیا میں پایا جاتا ہے جہاں وہ 37 فیصد سے زیادہ ہے۔

ہنگرانڈیکس کے مطابق 117 ممالک کے 2018 تک جمع ہونے والے غذائیت سے محروم بچوں اور کم عمر بچوں کی  اموات کے اعداد و شمار جمع کرکے فہرست تیار کی گئی ہے ۔