اسلامی تعاون تنظیم (او آئی سی) نے امریکی صدر ڈونلڈ ٹرمپ کے مشرق وسطیٰ امن منصوبہ کو مسترد کرتے ہوئے تنظیم کے 57 رکن ممالک سے مطالبہ کیا ہے کہ وہ اس پر عمل درآمد میں مدد نہ کریں۔

پیر کو سعودی عرب کے شہر جدہ میں او آئی سی ہیڈ کوارٹر میں وزرائے خارجہ کے اہم اجلاس میں یہ فیصلہ کیا گیاکہ تمام رکن ممالک اس منصوبے پر کسی بھی طرح امریکی انتظامیہ کی کوششوں میں تعاون نہیں کریں گے۔

 او آئی سی نے کہا کہ فلسطین میں امن فلسطینیوں سمیت تمام فریقین کی منظوری کے بغیر ممکن نہیں ہے ، اسلامی کانفرنس کی تنظیم امریکہ اور اسرائیل کے اس منصوبے کو مسترد کرتی ہے کیونکہ یہ منصوبہ فلسطینی مسلمانوں کی خواہشات پر پورا نہیں اترتا جو فلسطینی عوام کے جائز حقوق سے متصادم ہے ۔

او آئی سی نے مزید کہا کہ امریکہ کا منصنوبہ منصفانہ اور فریقین کے اطمینان کے مطابق ہونا چاہیے تھا ، یک طرفہ منصوبہ فلسطینیوں کے مطالبات اور امنگوں کو پورا نہیں کرتا ۔

گزشتہ ہفتے امریکی صدر ٹرمپ نے فلسطین اور اسرائیل کے درمیان تنازعہ ختم کرنے کیلئے مشرق وسطیٰ امن منصوبہ جاری کیا تھا جبکہ او آئی سی نے مستقبل کی فلسطینی ریاست کے دارالحکومت کے طور پر مشرقی بیت المقدس کے لئے اپنی حمایت کا اعادہ کیا ہے ۔

 او آئی سی کا کہنا ہے کہ فلسطینی ریاست کے علاقہ بالخصوص القدس الشریف کے مقدس شہر سے اسرائیلی قبضہ کے خاتمے اور اسرائیل کے مکمل انخلاءکے ساتھ ہی امن حاصل کیا جاسکتا ہے جس پر اسرائیل نے جون 1967کی مشرق وسطیٰ کی جنگ کے بعد قبضہ کر لیا تھا۔

دریں اثناءعرب لیگ نے بھی ہفتہ کے روز قاہرہ میں اپنے اہم اجلاس میں متنازعہ منصوبہ کو مسترد کر تے ہوئے کہا کہ یہ منصوبہ فلسطینی عوام کی امنگوں کے مطابق نہیں۔

سعودی عرب ہمیشہ اپنے فلسطینی بھائیوں کے ساتھ کھڑا ہے، وزیر خارجہ

خیال رہے کہ ٹرمپ نے وائٹ ہاؤس سے اسرائیلی وزیراعظم کے ساتھ کھڑے ہوکر اسرائیل اور فلسطین کے درمیان تنازع کا حل پیش کرتے ہوئے اس پالیسی کا اعلان کیا اور کہا کہ یہ منصوبہ اسرائیل اور فلسطین دونوں ممالک کیلئے جیت ہوگا۔

ٹرمپ نے مزید کہا کہ یہ منصوبہ دونوں ممالک کے حالات میں بہتری لائے گا اور انہوں نے فلسطینیوں سے وعدہ کیا کہ انہیں ایک علیحدہ ریاست دی جائے گی جس کا دارالخلافہ یروشلم (مقبوضہ بیت المقدس) کے پاس موجود علاقہ ابودیس ہوگا۔

علاوہ ازیں ٹرمپ کا یہ بھی کہنا تھا کہ یروشلم اسرائیل کا غیر منقسم دارالخلافہ ہوگا۔

فلسطین کی قیادت نے ٹرمپ کے اس منصوبے کو پہلے ہی مسترد کردیا تھا اور ساتھ ہی ان کا کہنا تھا کہ یہ سراسر ہماری خودمختاری کے خلاف ہے اور اسرائیل کے حق میں ہے۔

یاد رہے کہ او آئی سی دنیا میں اقوامِ متحدہ کے بعد دوسری سب سے بڑی بین الحکومتی تنظیم ہے۔ جس کے ارکان ممالک کی مجموعی آبادی 1.8 ارب سے بھی زائد ہے۔

اس کے علاوہ عرب لیگ بھی اس کا حصہ ہے جبکہ پاکستان، ترکی اور ایران بھی اس میں شامل ہیں۔ پانچ مبصر رکن بھی موجود ہیں جن میں روس اور تھائی لینڈ بھی شامل ہیں۔