برطانوی مسلح افواج کے وزیر نے خبردار کیا ہے کہ اقوامِ عالم یوکرائن پر روسی جارحیت کو نظرانداز نہیں کرسکتی کیونکہ یوکرائن تنازع یورپ میں ممکنہ طور پر ہزاروں زندگیاں نگل سکتا ہے۔
برطانوی مسلح افواج کے وزیر جیمز ہیپی نے آج میڈیا سے بات کرتے ہوئے روس کو تنبیہہ دی کہ وہ یوکرائن کے خلاف اپنے جارحانہ عزائم سے باز آ جائے ورنہ یہ تنازع یورپ میں ہزاروں اموات کا سبب بن جائے گا۔
برطانوی مسلح افواج کے وزیر کا کہنا تھا کہ یہ بات خارج از امکان نہیں کہ برطانوی اور روسی افواج آمنے سامنے آجائیں، برطانیہ ہلکے اینٹی ٹینک میزائل پہلے ہی یوکرائن بھیج چکا ہے۔
برطانوی مسلح افواج کے وزیر جیمز ہیپی کے مطابق روسی حکام کو یہ سمجھنے کی ضرورت ہے کہ جنگ کی صورت میں بہت خون ریزی ہوگی جو باقی دنیا نظرانداز نہیں کرے گی۔
برطانوی مسلح افواج کے وزیر جیمز ہیپی نے مزید کہا کہ اب تک معاملے کے حل کے لیے تمام سفارتی ذرائع استعمال کیے جا چکے ہیں۔
برطانوی مسلح افواج کے وزیر جیمز ہیپی نے اُمید ظاہر کرتے ہوئے کہا کہ تنازع حل کر لیا جائے گا کیونکہ روسی حکومت نے بھی اِس حقیقت کو سمجھ لیا ہے کہ جنگ چھڑی تو ہزاروں افراد اِس کی بھینٹ چڑھ جائیں گے۔
واضح رہے کہ روس اپنی سلامتی کے لیے امریکا اور اُس کے مغربی اتحادیوں سے نیٹو کی مشرقی یورپ میں پیش قدمی روکنے کی ضمانتوں کا خواہش مند ہے مگر امریکا اور نیٹو مشرقی یورپ میں اپنی موجودگی ختم کرنے سے انکاری ہیں۔
اِس صورتحال میں روس کی جانب سے یوکرائن پر حملے کا دباؤ بڑھایا جا رہا ہے جبکہ دوسری جانب امریکا اور اس کے مغربی اتحادی آئے روز روس کو جوابی کارروائی اور اقتصادی پابندیوں کی دھمکیاں دے رہے ہیں۔
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News