امریکا کی کئی ریاستوں میں شدید برفانی طوفان کے باعث معمولاتِ زندگی بری طرح متاثر ہوئے ہیں۔ امریکی حکام کے مطابق برفانی طوفان ’’نار ایسٹر‘‘ ملک کے شمال مشرقی حصے سے گزر رہا ہے۔

امریکا بھر میں گزشتہ روز بارش اور برفباری کی وجہ سے ساڑھے تین لاکھ گھروں اور کاروباری مراکز کو بجلی کی فراہمی متاثر ہوئی ہے۔

امریکی ریاست الباما کو طوفان کا سامنا رہا جہاں کچھ علاقوں میں برف کی تہیں بھی جم گئیں۔

برفانی طوفان کے باعث مسافروں کی پریشانی میں بھی اضافہ ہو گیا ہے کیونکہ مختلف ایئر لائنز کی جانب سے نو ہزار سے زائد پروازیں منسوخ کر دی گئی ہیں۔

شمالی نیو انگلینڈ کے کچھ حصوں میں مزید شدید برفباری کی پیش گوئی کی گئی ہے۔

آج بھی بدلتی موسمی صورتحال کے باعث کئی مقامات پر 12 سے 18 انچ تک برف پڑنے کا امکان ہے۔

امریکا میں شہریوں سے اپیل کی گئی ہے کہ طوفان میں کمی آنے تک سفر سے گریز کریں اور گھروں تک محدود رہیں۔

امریکی ریاستوں کے کئی شہروں میں بچے اور بڑے برفباری سے لطف اندوز ہوتے بھی نظر آئے۔

برف باری کے باعث ریاست میسوری میں شاہراہیں بند ہو گئی ہیں۔

ریاست انڈیانا میں برف باری سے کئی حادثات پیش آئے ہیں۔ ریاست نیو میکسیکو میں بیشتر سرکاری دفاتر میں کام کاج معطل کر دیا گیا ہے۔

نیشنل ویدر سروس کی ویب سائٹ کے مطابق ٹیکساس سے نیو انگلینڈ تک کے وسیع علاقے میں شدید برف باری جاری رہے گی اور ملک کی بعض جنوبی ریاستوں میں سیلاب کا خطرہ بھی ہے۔

مغربی الباما میں ایمرجنسی مینجمنٹ کے ڈائریکٹر رسل ویڈن نے ایک ٹی وی چینل کو بتایا ہے کہ گزشتہ روز دیہی علاقے میں برفانی طوفان سے ایک شخص اور خاتون ہلاک ہوئے ہیں جبکہ تین شدید زخمی ہیں۔

نیو یارک کی گورنر کیتھی ہولک نے شہریوں سے طوفان کے تھمنے تک گھروں میں رہنے کی اپیل کی ہے جبکہ آج اُنہوں نے ریاست میں ایمرجنسی کا اعلان بھی کیا تھا۔