ماحول کو بہتر بنانے کے لیے ابوظہبی میں یکم جون سے پلاسٹک شاپنگ بیگز پر مکمل پابندی عائد کردی گئی ہے۔

اماراتی اخبار کی رپورٹ کے مطابق ابوظہبی کی ماحولیاتی اتھارٹی نے ماحول کو بہتر بنانے کے لیے پلاسٹک شاپنگ بیگز پر مکمل پابندی کا فیصلہ کیا ہے جس کا اطلاق یکم جون سے ہوگا۔

رپورٹ کے مطابق ماحولیاتی اتھارٹی کا کہنا ہے کہ اسٹائرو فورم کے مادے سے تیار کردہ پلیٹیں، کپ، بوتلیں اور کھانا رکھنے کے ڈبو کے استعمال پر بھی 2024 تک مرحلہ وار پابندی عائد کی جائے گی۔

ان کا کہنا تھا کہ اس حوالے سے ایک عوامی آگاہی مہم کا بھی آغاز کیا جائے گا جس میں ان اشیاء کے استعمال سے متعلق نقصانات کے بارے میں معلومات فراہم کی جائیں گی۔

انہوں نے کہا ایک بار استعمال کی جانے والی پلاسٹک کی مصنوعات پرانحصارکم کرنے کے لیے تجارتی اداروں اورمارکیٹوں کی انتظامیہ کو بھی آگاہی مہم بھی شروع کی جارہی ہے۔

اس آگاہی مہم کے تحت تجارتی اداروں کو انتباہی نوٹسز بھی جاری کیے جائیں گے جبکہ انتباہی نوٹس کے اجراء کی مہم بڑی سپرمارکیٹوں سے کی جائے گی۔

انہوں نے مزید کہا کہ بعد ازاں مرحلہ وار دیگر دکانداروں کو بھی اس بارے میں نوٹسز جاری کیے جائیں گے۔

اتھارٹی نے خبردار کیا ہے کہ پلاسٹک کے شاپنگ بیگز جنہیں استعمال کے بعد درست طریقے سے تلف نہیں کیا جاتا وہ سمندری اور زمینی ماحول کی خرابی کا بڑا سبب ہوتے ہیں۔

تاہم پلاسٹک کے شاپنگ بیگز کی جگہ متعدد باراستعمال ہونے والے تھیلے متعارف کرائے جائیں گے جو ماحول دوست ہوتے ہیں۔

رپورٹ میں مزید کہا گیا ہے کہ شاپنگ بیگز درست طریقے سے تلف نہ کیے جانے کی وجہ سے ہرسال 10 لاکھ سے زائد سمندری پرندے ہلاک ہوجاتے ہیں۔

ایک سروے کے مطابق امارات میں شاپنگ بیگز کے استعمال کی تعداد بہت زیادہ ہے جبکہ سالانہ 11 ارب شاپنگ بیگز استعمال کیے جاتے ہیں۔