کویت جانے کے خواہشمند پاکستانیوں کیلئے بڑی خوشخبری آگئی ہے۔

عرب میڈیا کے مطابق کویت میں پاکستان کے سفیر ملک محمد فاروق نے کہا ہے کہ دونوں ممالک کے درمیان مختلف شعبوں میں مضبوط تعلقات ہیں، پاکستانی ڈاکٹرز، نرسوں اورتکنیکی ماہرین کی نئی کھیپ موسم گرما کے اختتام سے پہلے کویت آئے گی۔

انہوں نے کہا کہ یہ طبی عملہ کویت کی وزارت صحت کے زیرانتظام کام کرے گا کیوں کہ پاکستانی طبی عملے نے مشکل ترین حالات میں اپنی صلاحیتوں کا لوہا منوایا ہے،انہوں نے کورونا بحران کے دوران نمایاں کردار ادا کیا۔

ملک محمد فاروق نے کہا کہ ہم نے کویتی نجی شعبے کے ساتھ بات چیت کی ہے کہ جلد ہی نجی اسپتالوں میں بھی پاکستانی طبی ٹیموں کو کام کرنے کے لیے لایا جائے، ہمارے پاس مختلف شعبوں میں بہت سے ہنرمند کارکن ہیں، ہم کویت کی خدمت کرنے اورنئی نسلوں کو کویت میں کام کرنے اورکویت کی ترقی میں اپنا حصہ ڈالنے کا موقع فراہم کرنے کے لیے تیارہیں۔

انہوں نے کہا کہ ہم پاکستانی تاجروں اور ہنر مند پیشہ ور افراد کے لیے داخلے کے ویزوں کے حصول کے طریقہ کار میں نرمی کی امید کر رہے ہیں تاکہ کویتی اورپاکستانی تعلقات کو مزید مضبوط کیا جا سکے۔

ملک محمد فاروق نے کہا کہ کویت مختلف قومیتوں کے تارکین وطن کارکنوں کو قانونی تحفظ فراہم کرتا ہے۔

کویت میں پاکستان کے سفیر ملک محمد فاروق نے کہا ہے کہ پاکستان کویت کے ساتھ مختلف شعبوں خاص طور پرصحت، روزگار، انفارمیشن ٹیکنالوجی، خوراک اور تحفظ میں تعلقات کو مضبوط کرنا چاہتا ہے۔