نئی دہلی: مشرقی لداخ میں بھارت اور چین کے درمیان جھڑپوں کے بعد بھارتی فوج مسلسل نئے ہتھیاروں کا اضافہ کر رہی ہے۔

بھارتی ذرائع ابلاغ کی ایک رپورٹ کے مطابق 14 ہزار 500 فٹ بلندی پر واقعہ نیوما ملٹری اسٹیشن پر بھارتی فوج کی جانب سے شامل کیے گئے جدید ہتھیاروں کے نظام اور آلات کو دیکھا گیا ہے۔

رپورٹ کے مطابق حال ہی میں بھارتی فوج نے ملک میں بنے ہوئے دھنوش ہووٹزر کو شامل کیا ہے جسے ٹیکنالوجی کی منتقلی کے تحت بوفورس ہووٹزرکے لیے تیار کیا گیا تھا اور اسے مزید جدید بنایا گیا ہے۔

کشمیر میڈٰیا سروس کے مطابق آرٹلری ریجمنٹ کے کیپٹن وی مشرا کا کہنا ہے کہ دھنوش ہووٹزر 48 کلومیٹر تک اہداف کو نشانہ بنا سکتا ہے اور اسے پچھلے سال ہی مشرقی لداخ میں شامل کیا گیا ہے۔

سابقہ آرڈیننس فیکٹری بورڈ کی تیار کردہ تقریبا 114 گنز بھارتی فوج میں شامل ہوں گی، ایم فورکوئیک ری ایکشن فورس کی گاڑیاں گزشتہ سال فورس میں شامل ہونا شروع ہوئیں اور فوج کا مشرقی لداخ سیکٹر کے آگے والے علاقوں میں ایسی گاڑیوں کو زیادہ تعداد میں شامل کرنے کا منصوبہ ہے۔

رپورٹ میں کہا گیا ہے کہ بھارتی فوج میں نگرانی کے آلات کو بھی مضبوط کیا گیا ہے کیونکہ نیا ’’ٹاٹا راجک سسٹم‘‘ فورس میں شامل کیا گیا ہے جو 15کلومیٹر سے زیادہ دور سے انسانوں اور 25 کلومیٹر سے زیادہ دورسے گاڑیوں کا پتہ لگا سکتا ہے۔

علاوہ ازیں بھارت نے مشرقی لداخ سیکٹر میں دشمن کے ٹینکوں اور بکتر بند لڑاکا گاڑیوں سے نمٹنے کے لیے فوجیوں کو اسپائک اینٹی ٹینک گائیڈڈ میزائل بھی فراہم کیے ہیں۔