یروشلم: جنوبی لبنان کی سرحد پر اسرائیل اور حزب اللہ میں جھڑپ ہوئی جس کے نتیجے میں حزب اللہ کے تین ارکان زخمی ہوگئے ہیں۔

غیر ملکی خبر رساں ادارے کی رپورٹ کے مطابق جنوبی لبنان کی سرحد پر اسرائیل اور حزب اللہ کے درمیان جھڑپ میں حزب اللہ کے تین ارکان زخمی ہوگئے ہیں۔

رپورٹ کے مطابق حزب اللہ کی جانب سے واقعہ پر فوری طور پر کوئی ردعمل سامنے نہیں آیا ہے۔

دوسری جانب اسرائیلی فوج نے دعویٰ کیا ہے کہ کئی افراد نے سرحدی باڑ کو سبوتاژ کرنے کی کوشش کی تھی۔

یہ واقعہ حزب اللہ اور اسرائیل کے درمیان ایک ماہ سے جاری جنگ کے آغاز کی 17 ویں برسی کے موقع پر پیش آیا ہے۔

جنگ کے آغاز کے بعد سے لبنان میں 1,200 افراد جاں بحق ہوئے جن میں زیادہ تر عام شہری ہیں جب کہ 160 کے قریب اسرائیلی فوجی لبنان کے اندر حزب اللہ سے لڑتے ہوئے ہلاک ہوئے ہیں۔

اس موقع پر حزب اللہ کے سربراہ حسن نصر اللہ نے ٹی وی پر خطاب کرتے ہوئے کہا کہ واقعہ کی تحقیقات جاری ہیں تاہم انہوں نے مزید تفصیلات شیئر نہیں کی ہیں۔

لبنانی ذرائع نے پیش رفت پر بریفنگ دیتے ہوئے اس واقعے کو ایک حملہ قرار دیا ہے اور کہا ہے کہ حزب اللہ کے متعدد ارکان زخمی ہوئے ہیں۔

ایک لبنانی سیکورٹی ذرائع نے غیر ملکی میڈیا کو بتایا کہ اسرائیلی فوجیوں نے دستی بم کی طرح کچھ فائر کیا تھا جس سے چھرے نکلے اور حزب اللہ کے تین ارکان زخمی ہوگئے۔

میڈٰیا رپورٹس کے مطابق اسرائیل نے سرحدی باڑ کو سبوتاژ کرنے کی بار بار کوششوں کے بعد “احتیاطی ٹیکنالوجیز” کو شامل کیا ہے۔