امریکا، کینیڈا، فرانس، جرمنی، اٹلی اور برطانیہ نے اسرائیل کی حمایت جاری رکھنےکے عزم کا اظہار کیا ہے۔

جو بائیڈن نے کینیڈا کے وزیر اعظم جسٹن ٹروڈو، فرانس کے صدر ایمانوئل میکرون، جرمنی کے چانسلر اولاف شولز، اٹلی  کی وزیر اعظم جارجیا میلونی اور برطانیہ کے وزیر اعظم رشی سوناک  سے ٹیلی فونک کانفرنس کی۔

ٹیلی فونک کانفرنس کے بعد مشترکہ اعلامیے میں اسرائیل کی حمایت جاری رکھنےکے عزم کا اظہار کیا گیا۔

امریکا سمیت دیگر اتحادی ممالک نے اسرائیل سے عالمی قوانین کی پاسداری اور شہریوں کے تحفظ پر بھی زور دیتے ہوئے کہا کہ اسرائیل بین الاقوامی قوانین پر عمل کرےاور شہریوں کو تحفظ فراہم  کرے۔

مشترکہ اعلامیے میں مزید کہا گیا کہ مشرق وسطیٰ میں سیاسی حل اور پائیدار امن دیکھنا چاہتے ہیں۔ دو یرغمالیوں کی رہائی کا خیرمقدم کرتے ہیں باقی تمام یرغمالیوں کو بھی فوری رہا کیا جائے۔

کانفرنس میں خطے کے اہم شراکت داروں کے ساتھ تصادم کو پھیلنے سے روکنے کے لیے سفارتی  کوششوں پر بھی اتفاق کیا گیا۔

واضح رہے کہ غزہ پر اسرائیل کی وحشیانہ بمباری جاری ہے جس میں 1873 بچوں اور 1023 خواتین سمیت 4651 فلسطینی شہید ہوگئے جبکہ زخمیوں کی تعداد 14 ہزار سے تجاوز کر گئی ہے۔

فلسطینی وزیر اطلاعات کے مطابق گزشتہ 24 گھنٹوں کے دوران شدید بمباری سے 400 فلسطینی شہید ہوئے۔

فلسطینی میڈیا نے اسرائیلی بربریت کو اب تک کی بدترین بمباری قرار دے دیا۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے یوٹیوب چینل کو سبسکرائب کریں  https://bit.ly/3Tv8a3P اور بیل آئیکن پر کلک کریں