دمشق میں ایرانی قونصل خانے پر حملے کے بعد ایرانی وزیر خارجہ نے کہا کہ اسرائیل کے خلاف انتقامی کارروائی ہمارا جائز حق ہے۔

ایرانی وزیر خارجہ حسین امیر عبداللہیان نے کہا کہ ہم دمشق میں ایرانی قونصل خانے پر حملے کے بعد اسرائیل کے خلاف ممکنہ انتقامی کارروائی کو اپنا دفاع مانتے  ہیں۔

عبداللہیان نے جرمنی کی وزیر خارجہ اینا لینا بیئربوک کے ساتھ ٹیلی فون پر گفتگو میں اسرائیل کے خلاف زیادہ سے زیادہ تحمل سے کام لینے کی برلن کی اپیل کو قبول نہیں کیا۔

ایرانی وزیر خارجہ کا کہنا تھا کہ موجودہ مسائل کا واحد حل غزہ میں اسرائیل کے حملوں کو روکنا ہے۔

خیال رہے کہ گزشتہ ہفتے دمشق میں ایرانی قونصل خانے پر حملے میں 13 افراد جاں بحق ہوگئے تھے جن میں 7 ایرانی فوجی مشیر بھی شامل تھے۔

اس حملے کا الزام ایرانی حکام نے اسرائیل پر عائد کیا ہے جب کہ جاں بحق ہونے والوں میں شام اور لبنان میں اسلامی انقلابی گارڈ کور کے سینئر کمانڈر جنرل محمد رضا زاہدی اور ان کے نائب جنرل ہادی حج رحیمی بھی شامل تھے۔

حملے کے بعد ایران کی اعلیٰ سیاسی و عسکری قیادت نے جوابی کارروائی کا عزم کیا ہے جس کے بعد کئی ممالک نے صورت حال کو کم کرنے کے لیے ثالثی کی کوشش کی ہے۔