واشنگٹن: امریکی جریدے کا کہنا ہے کہ صدر ڈونلڈ ٹرمپ کے دوسرے دور میں پاکستان نے واشنگٹن کے ساتھ مؤثر اور کامیاب سفارتی تعلقات قائم کیے۔

امریکی جریدہ فارن پالیسی نے پاکستان اور امریکہ کے تعلقات پر ایک رپورٹ جاری کی ہے، جس میں کہا گیا ہے کہ صدر ڈونلڈ ٹرمپ کے دوسرے دور میں پاکستان نے واشنگٹن کے ساتھ مؤثر اور کامیاب سفارتی تعلقات قائم کیے۔

رپورٹ کے مطابق، صدر ٹرمپ اور پاکستان کے اعلیٰ رہنماؤں بشمول وزیراعظم شہباز شریف اور فیلڈ مارشل کے درمیان مضبوط ذاتی کیمسٹری قائم ہوئی۔

مزید پڑھیں: امریکا پاکستان کو 70 لاکھ  ڈالر فراہم کرے گا، اے ڈی بی

صدر نے دونوں رہنماؤں کو کئی بار وائٹ ہاؤس مدعو کیا اور اہم مذاکرات میں پاکستان کی شرکت اور بروقت تعاون کو سراہا۔

جریدے کے مطابق کابل دھماکے کے ماسٹر مائنڈ کی گرفتاری میں بھی پاکستان نے امریکی حکومت کو مؤثر مدد فراہم کی۔

فارن پالیسی کے مطابق پاکستان نے امریکہ کے اعتماد کو بروقت تعاون کے ذریعے حاصل کیا اور کرٹیکل منرلز کے شعبے میں اہم کامیابیاں حاصل کیں۔

رپورٹ میں بتایا گیا کہ ایف ڈبلیو اے اور امریکی کمپنی کے درمیان 500 ملین ڈالر کا معاہدہ بھی شامل ہے، جبکہ کرپٹو تعاون میں اضافہ ہوا ہے اور پاکستان نے کرپٹو کونسل کے ذریعے ورلڈ لبرٹی فنانشل کے ساتھ شراکت بڑھائی۔

مزید پڑھیں: امریکا پاکستان کا سب سے بڑا تجارتی پارٹنر ہے، وزیراعظم

رپورٹ میں مزید کہا گیا ہے کہ صدر ٹرمپ کا بھارت کے ساتھ رویہ سخت رہا، جس کی وجہ ٹیرف، روسی تیل کی خریداری اور حالیہ پاک بھارت کشیدگی تھی، جبکہ پاکستان نے کھل کر جنگ بندی کا کریڈٹ صدر ٹرمپ کو دیا، جسے بھارت نے مسترد کیا۔

امریکی جریدے کے مطابق پاکستان کی گرمجوشی اور تعاون کے باعث امریکی بیانیہ پاکستان کے لیے نرم ہوا اور پاکستان کی خواہش ہے کہ امریکہ تعلقات کو کسی تیسرے ملک کے تناظر میں نہ دیکھے۔

یہ رپورٹ پاکستان اور امریکہ کے تعلقات میں حالیہ کامیابیوں اور چیلنجز کو اجاگر کرتی ہے اور دونوں ممالک کے مستقبل کے سفارتی روابط پر روشنی ڈالتی ہے۔