امریکی صدر ڈونلڈ ٹرمپ نے کہا ہےکہ وینزویلا  کو  اقتدار کی منتقلی تک ہم چلائیں گے، ہماری تیل کی کمپنیاں وینزویلا جائیں گی۔

فلوریڈا میں پریس کانفرنس کرتے  ہوئے ڈونلڈ ٹرمپ نے  وینزویلا کے صدر مادورو کےخلاف کرمنل چارجز کا اعلان کرتے ہوئےکہا کہ مادورو اور ان کی اہلیہ کو نیویارک منتقل کیا جا رہا ہے، انہیں  قانون کے کٹہرےمیں لایا جائےگا۔

ڈونلڈ ٹرمپ کا کہنا تھا کہ میری ہدایت  پر امریکی فوج نے وینزویلا کے دارالحکومت میں ایک غیرمعمولی آپریشن کیا، امریکی فوج کی فضائی، زمینی اورسمندری طاقت کا شاندار مظاہرہ دیکھا گیا، یہ امریکی فوجی طاقت کا ایک غیرمعمولی اور شاندار  مظاہرہ تھا۔

https://x.com/i/broadcasts/1BdGYZQwgQDJX

امریکی صدر کا کہنا تھا کہ مادورو اور ان کی اہلیہ کو  امریکی فورسز نے ان کے بیڈروم سے پکڑا، جب انہیں گرفتار کیا گیا توکراکس میں مکمل اندھیرا تھا اور بجلی بند تھی۔

ان کا کہنا تھا کہ سلیمانی اور البغدادی کو بھی ہم نے اسی طرح نشانہ بنایا تھا، ایران کی جوہری تنصیبات کو بھی اسی طرح کے حملے میں تباہ کردیا تھا، ہم نے تمام اہداف کوبالکل درست نشانہ بنایا، دنیا میں کوئی اور ملک ایسا کارنامہ انجام نہیں دے سکتا۔

قبل ازیں، امریکا کے صدر ڈونلڈ ٹرمپ نے کہا تھا کہ وینزویلا کے صدر نکولس مادورو کو پکڑنے کی ویڈیو ٹی وی شو کی طرح لائیو دیکھی۔

 امریکی ٹی وی چینل کو انٹرویو میں ٹرمپ کا کہنا تھاکہ وینزویلا کے صدر نکولس مادورو کو پکڑنے کی ویڈیو فوجی جنرلز کے ساتھ فلوریڈا میں دیکھی۔

انہوں نے کہا کہ مادورو کو لے کر امریکی بحری جہاز نیویارک آرہا ہے، ان پر مین ہٹن کی عدالت میں منشیات اور اسلحے کی اسمگلنگ کا مقدمہ چلے گا۔

ان کا کہنا تھاکہ  ان کے خلاف آپریشن کی خفیہ تیاری دسمبر کے اوائل سے کی تھی، تاہم وینزویلا پر کس کی حکمرانی ہوگی، یہ ابھی طے ہونا ہے۔

امریکی صدر کا کہنا تھاکہ مادورو کے خلاف آپریشن میں ایک ہیلی کاپٹر حادثے میں کچھ امریکی زخمی ہوئے ہیں۔

دوسری جانب امریکی میڈیا کے مطابق مادورو اور اہلیہ سیلیا فلوریس کو امریکی فورسز نے ان کے بیڈروم سے پکڑا۔

خیال رہے کہ امریکا نے آج صبح وینزویلا پر حملہ کرکے وینزویلا کے صدر نکولس مادورو اور ان کی اہلیہ کو گرفتار کرلیا ہے۔

کارروائی امریکی جنگی طیاروں نے کی اور ڈیلٹا فورس نے دارالحکومت کاراکاس میں اہداف کو نشانہ بنایا۔

وینزویلا نے حملوں کو جارحیت قرار دے دیا اور کہا کہ حملے کا مقصد وینزویلا کے تیل اور معدنیات پر قبضہ کرنا ہے۔