ایمنسٹی انٹرنیشنل نے افغان طالبان رجیم کی جانب سے میڈیا سپورٹ تنظیموں کے پرمٹ منسوخ کرنے پر سخت ردعمل دیا ہے۔
افغان طالبان رجیم نے اظہارِ رائے کی آزادی پر نئی پابندیاں عائد کرتے ہوئے میڈیا پر قدغنوں کے بعد میڈیا سپورٹ تنظیموں کے پرمٹ بھی منسوخ کر دیے، جس پر ایمنسٹی انٹرنیشنل نے سخت ردعمل دیا ہے۔
ایمنسٹی انٹرنیشنل کے مطابق یہ اقدامات افغانستان میں آزادیِ اظہار کو دبانے اور ذرائع ابلاغ پر مکمل کنٹرول قائم کرنے کی مذموم کوششوں کا حصہ ہیں۔
تنظیم کا کہنا ہے کہ طالبان رجیم میں میڈیا سپورٹ ادارے پہلے ہی دھمکیوں، سخت پابندیوں اور مالی مشکلات کا سامنا کر رہے ہیں۔
مزید پڑھیں: افغان طالبان رجیم میں افغانستان کا اقتصادی مستقبل تاریک
ایمنسٹی انٹرنیشنل نے واضح کیا کہ افغان طالبان کے انتہا پسندانہ اقدامات، میڈیا کو زیادہ موثر اور منظم بنانے کے دعوؤں کے بالکل برعکس ہیں اور اس سے آزاد صحافت مزید کمزور ہو رہی ہے۔
ماہرین کے مطابق طالبان رجیم کی آمرانہ سوچ اور غیر منصفانہ فیصلوں کے باعث آزاد میڈیا شدید خطرات سے دوچار ہو چکا ہے اور صحافت پہلے سے زیادہ غیر محفوظ بنا دی گئی ہے۔
ان کا کہنا ہے کہ طالبان جوابدہی، شفافیت اور انسانی حقوق کی پامالیوں کو دبانے کے لیے میڈیا پر شکنجہ مزید مضبوط کر رہے ہیں تاکہ اپنی ناکامیوں کو چھپایا جا سکے۔
ماہرین نے خبردار کیا ہے کہ افغانستان میں میڈیا پر عائد پابندیاں ایک سوچے سمجھے منصوبے کے تحت سچ، اختلافِ رائے اور عوامی شعور کے خاتمے کی منظم کوشش ہیں۔
