امریکا میں کیے گئے مختلف سرویز کے مطابق شہریوں کی بڑی تعداد نے ایران پر ممکنہ امریکی اور اسرائیلی حملوں کی مخالفت کا اظہار کیا ہے۔

میڈیا رپورٹس کے مطابق رائٹرز، سی این این اور اپسوس کی جانب سے امریکی شہروں میں کیے گئے سروے میں ایران پر حملوں کے معاملے پر عوامی رائے لی گئی۔

نیویارک ٹائمز کے مطابق ایک سروے میں 43 فیصد امریکی شہریوں نے ایران پر حملوں کی مخالفت کی، جبکہ صرف ایک چوتھائی امریکیوں نے امریکا اور اسرائیل کی جانب سے ممکنہ فوجی کارروائی کی حمایت کی۔

مزید پڑھیں: سری لنکا کے قریب ایرانی بحری جہاز پر امریکی حملہ؛ بھارت میں سیاسی ہلچل

رپورٹ کے مطابق سروے میں 1200 سے زائد امریکی شہریوں سے ایران پر حملوں کے حوالے سے رائے لی گئی۔

سی این ای کے سروے میں تقریباً 60 فیصد امریکی شہریوں نے ایران پر حملوں کو مسترد کردیا، جبکہ اتنے ہی افراد نے یہ رائے بھی دی کہ صدر ڈونلڈ ٹرمپ کے پاس اس معاملے پر واضح حکمت عملی موجود نہیں۔

سروے کے مطابق 39 فیصد امریکی شہریوں کا کہنا تھا کہ فوجی اقدام سے قبل سفارتی کوششیں ناکافی تھیں۔

نتائج کے مطابق ڈیموکریٹس اور آزاد ووٹرز کی بڑی اکثریت ایران پر حملوں کے خلاف سامنے آئی، جہاں 82 فیصد ڈیموکریٹس اور 68 فیصد آزاد ووٹرز نے اس اقدام کی مخالفت کی، جبکہ 23 فیصد ریپبلکن ووٹرز نے بھی ایران پر حملوں کو ناپسند کیا۔