‏پاکستان کرکٹ بورڈ(پی سی بی) کی جانب سے    زمبابوے کے خلاف ہوم سیریز میں نوجوان کھلاڑیوں کو موقع  دینے کا پلان تیار کر لیا گیا۔

تفصیلات کے مطابق  پاکستان ٹیم کے کوچز میں   زمبابوے کے خلاف ہوم سیریز میں ینگ بلڈ کو  موقع دینے پر اتفاق رائے پایا گیا ہے۔

ذرائع  ٹیم مینجمنٹ کا کہنا ہے کہ  کس کھلاڑی کو  کس فارمیٹ میں موقع دینا  ہے  ، اس حوالے سے  حکمت عملی طے کی جارہی ہے۔ ٹیم مینجمنٹ کے اراکین کی مشاورت کا سلسلہ جاری ہے۔

ذرائع ٹیم مینجمنٹ کا کہنا ہے کہ   زمبابوے سخت حریف نہیں ،   اس لیے جونئیر کھلاڑیوں کو آزمانے کا اچھا موقع ہے ۔  نیشنل ٹی ٹوئنٹی کے پرفارمرز کو بھی  زمبابوے کے خلاف سیریز کے لیے منتخب کیا جائے گا۔

پاکستان ٹیم کا کوچنگ اسٹاف بھی کھلاڑیوں کے بارے میں رائے دے گا  ۔

واضح رہے کہ  زمبابوے کرکٹ ٹیم  نے آئندہ ماہ تین ون ڈے اور تین ٹی ٹوئنٹی میچز کی سیریز کے لیے پاکستان کا دورہ کرنا ہے ۔

زمبابوے ٹیم کی  20 اکتوبر کو پاکستان آمد  پلان کی جا رہی ہے  جبکہ سیریز 9 نومبر تک جاری  رہنے کا امکان ہے ۔

زمبابوے کرکٹ نے  دورے کی تصدیق کر دی ہوئی ہے  اور اسے حکومت کی  جانب سے دورے کی اجازت  بھی مل گئی ہے۔

سیریز کے  شیڈول کا باضابطہ  اعلان آئندہ  چند روز میں  متوقع ہے ۔