برطانیہ اور یورپی یونین میں بریگزٹ ڈیل طے پاگئی ہیں۔

غیر ملکی میڈیا کے مطابق برطانیہ اور یورپی یونین میں بریگزٹ ڈیل  سے متعلق وزیراعظم بورس جانسن کچھ دیر میں پریس کانفرنس میں تفصیلات سے آگاہ کرینگے۔

حکومتی اعلامیہ کے مطابق ڈیل کے ذریعے برطانوی عوام سے ریفرنڈم اور انتخابات کے موقع پر کئے جانے والے وعدے پورے ہوگئے، ہم نے رقم، بارڈر کنٹرول، قانون، تجارت اور ماہی گیری پر اپنا کنٹرول واپس لے لیا ہے، پورے ملک کے بزنسز اور خاندانوں کیلئے یہ زبردست خبر ہے۔

برطانیہ کے ساتھ بریگزٹ ٹریڈ ڈیل طے ہونے پر صدر یورپی کمیشن ارسلا وین ڈر لین کا پریس کانفرنس کرتے ہوئے کہنا تھا کہ ایک لمبے اور پر پیچ راستے کا اختتام ایک اچھے معاہدے پر ہوا، یہ ایک متوازن اور مساوی ڈیل ہے، تجارتی معاملات طے کرنا ایک  ذمہ دارانہ اور درست عمل ہے۔

انہوں نے مزید کہا کہ یورپی یونین برطانیہ سے باہمی دلچسپی کے تمام بشمول ماحولیاتی تبدیلی، توانائی، سیکیورٹی اور ٹرانسپورٹ  کے تعاون جاری رکھے گی، اب بھی متفق رہ کر ہم بہتر نتائج حاصل رک سکتے ہیں۔

دوسری جانب سابق وزیراعظم ڈیوڈ کیمرون کا کہنا ہے کہ بریگزٹ ڈیل اچھی خبر ہے، ڈیل طے ہونے سے مشکل مرحلے کا اختتام ہوا، بریگزٹ ڈیل یورپ کے ساتھ تعلقات کا نیا سنگ میل ہے۔