وزیر اعظم کے معاون خصوصی برائے سیاسی ابلاغ ڈاکٹر شہباز گل نے کہا کہ آج قوم نااہل خاندانی تسلط کی قیمت اپنا پیٹ کاٹ کر چکا رہی ہے۔

تفصیلات کے مطابق وزیر اعظم کے معاون خصوصی برائے سیاسی ابلاغ  ڈاکٹر شہباز گل نے اسلام آباد میں شہباز شریف کے بیان پر ردعمل دیتے ہوئے کہا کہ20  ارب ڈالر‏‎ کرنٹ اکاؤنٹ خسارہ چھوڑنے والے کس منہ سے معیشت پر درس دے رہے ہیں۔

انہوں نے کہا کہ قوم پر 30 ہزار ارب کا قرضہ تھوپنے والوں نے پراجیکٹس میں پیسے بنائے،  بھگوڑے وزیر خزانہ نے مصنوعی طریقے سے ڈالرز 120 روپے پر رکھا، زلزلہ زدگان کی امداد کھانے والے قوم کے پیسوں پر رونے کا ڈرامہ رچا رہے ہیں۔

شہباز گِل نے کہا کہ سرکاری تحائف گھر لے جانے والوں کو قوم کے پیسوں کا منجن زیب نہیں دیتا، قوم کوغُربت کا تحفہ دینے والے نااہل شریف خاندانی شاہی اخراجات کرتے رہے، آپ کو قوم کے پیسے کی نہیں شریفوں کی تجوریوں میں نہ جانے والے پیسے کی تکلیف ہے۔

وزیر اعظم کے معاون خصوصی برائے سیاسی ابلاغ ڈاکٹر شہباز گل نے مزید کہا کہ موصوف نے کورونا پر سیاست کی بھونڈی کوشش کی، لندن سے ماسک پہن پر اس نیت سے آئے کہ ریلیف حاصل کریں گے، پوری قوم کورونا کے خلاف متحد جبکہ اپوزیشن ہرزہ سرائی میں مصروف ہے۔