امیر جماعت اسلامی سراج الحق نے کہا ہے کہ حکمرانوں کی نااہلی اور ناکامی نے پوری قوم کو آزمائش سے دوچار کر دیا ہے۔

تفصیلات کے مطابق امیر جماعت اسلامی سراج الحق نے کہا ہے کہ پی ٹی آئی کی سونامی نے عوام کو گھروں کے سامان کی نیلامی پر مجبور کر دیا ہے ، مہنگائی کی نئی لہر پر وفاقی وزراء شرمندہ ہونے کے بجائے عوام کا مذاق اڑا رہے ہیں۔

انہوں نے کہا کہ نااہل حکومت کی وجہ سے، مہنگائی، بے روزگاری اور کرپشن عوام پر حملہ آور ہیں ، آئی ایم ایف کی غیر مشروط غلامی نے حکومت کو بے وقار کر دیا ہے ، وزیراعظم آئی ایم ایف کی ہدایت پر عوام کے خون پسینے سے کمائی گئی ایک ایک پائی نچوڑنا چاہتے ہیں ، حکمرانوں کی بے تدبیریوں کی وجہ سے ملک افراتفری کا شکار ہو چکا ہے۔

سراج الحق نے کہا ہے کہ حکمرانوں کو اللہ کا زرا بھی خوف ہوتا تو شریعت سے متصادم قانون سازی کی جرات نہ کرتے ، اسلام آباد میں 31 اکتوبر کو بے روز گار نوجوانوں کا احتجاج ملک میں  فیصلہ کن حکومت مخالف تحریک کی بنیاد بنے گا ، اب وہ وقت دور نہیں جب وطن عزیز میں اسلامی نظام کا خواب شرمندہ تعبیر ہوگا۔

امیر جماعت اسلامی سراج الحق نے کہا ہے کہ حکومت آئی ایم ایف سے طے کردہ شرائط اور معاہدے قوم کے سامنے لائے ، حکمرانوں کی نااہلی اور ناکامی نے پوری قوم کو آزمائش سے دوچار کر دیا ہے ، نوجوانوں سے ایک کروڑ نوکریوں کا وعدہ کرکے لاکھوں افراد سے روزگار چھین لیا ، امیرجماعت اسلامی 31 اکتوبر کو اسلام آباد میں آئندہ کے لائحہ عمل کا اعلان کرے گی۔