لاہور کی احتساب عدالت نے شہباز شریف کو ذاتی حیثیت میں طلب کرلیا ہے۔

تفصیلات کے مطابق لاہور کی احتساب عدالت نے سابق وزیراعلیٰ پنجاب و اپوزیشن لیڈر شہباز شریف کو 7 جنوری کو ذاتی حیثیت میں طلب کیا ہے۔

ذرائع کے مطابق احتساب عدالت کے جج امجد نذیر چودھری نے تحریری حکم نامہ جاری کیا۔

عدالت نے کہا شہباز شریف آشیانہ اقبال کرپشن ریفرنس میں مسلسل غیر حاضر ہیں، لیگی رہنما کی عدم پیشی کے باعث کارروائی متاثر ہو رہی ہے۔

احسن اقبال کو آج احتساب عدالت پیش کیا جائیگا

عدالت نے مزید کہا کہ شہباز شریف کو آخری موقع دیا جاتا ہے، آئندہ حاضری یقینی بنائیں۔

یاد رہے کہ آشیانہ ہاؤسنگ سکینڈل کیس میں شہباز شریف سمیت 10 ملزمان پر فرد جرم عائد ہوچکی ہے۔

دوسری جانب سابق وزیر داخلہ و مسلم لیگ (ن) کے مرکزی رہنما احسن اقبال کوبھی آج احتساب عدالت میں پیش کیا جائے گا۔

 احسن اقبال کوگزشتہ دن نارووال سپورٹس سٹی کمپلیکس کیس میں نیب راولپنڈی نے لیگی رہنما کو گرفتار کیا تھا۔

 ذرائع کے مطابق نیب احسن اقبال کا 14 روزہ جسمانی ریمانڈ کی استدعا کرے گا، نیب نے نارووال سپورٹس سٹی پراجیکٹ میں بے ضابطگیوں کے الزام میں احسن اقبال کو گرفتار کیا تھا۔

نیب اعلامیے میں کہا گیا کہ احسن اقبال کو نارووال سپورٹس سٹی منصوبے میں بے ضابطگیوں کی تحقیقات کے لیے گرفتار کیا گیا، احسن اقبال کی گرفتاری کے احکامات چیئرمین نیب نے جاری کیے تھے جن کی تعمیل کی گئی ہے، گرفتاری سے سپیکر قومی اسمبلی کوبھی آگاہ کر دیا گیا ہے۔

دوسری جا نب گرفتاری پر ترجمان ن لیگ مریم اورنگزیب نے سخت رد عمل کا اظہار کرتے ہوئے گرفتاری کو بلا جواز قرار دے دیا۔

 گزشتہ دن سابق وزیر داخلہ و مسلم لیگ (ن) کے مرکزی رہنما احسن اقبال کوگرفتار کیا تھا، انھیں نیب نے نارووال اسپو رٹس سٹی کیس کی تحقیقات کےلئے طلب کیا تھا۔

راولپنڈی کے تفتیشی افسر نے نارووال میں مبینہ بدعنوانی کے معاملے کی تحقیقات کیں