پاکستان تحریک انصاف (پی ٹی آئی) کے رہنما شیخ رشید کا کہنا ہے کہ عمران خان کا لانگ مارچ عارضی طور پر رُکا ہے ختم نہیں ہوا۔

سماجی رابطے کی ویب سائٹ ٹوئٹر پر اپنے جاری کردہ بیان میں شیخ رشید نے کہا کہ 3 دن سے ایف آئی آر نہیں کٹی تھانے میں بجلی نہیں، سیاسی درجہ حرارت میں کوئی کمی نہیں آئی، ججز انتہائی قابل احترام ہیں لیکن تفتیشی نہیں۔

عمران خان کا لانگ مارچ عارضی طور پے رُکا ہے ختم نہیں ہوا 3 دن سے ایف آئی آر نہیں کٹی تھانے میں بجلی نہیں سیاسی درجہ حرارت میں کوئی کمی نہیں آئی ججز انتہائی قابل احترام ہیں لیکن تفتیشی نہیں نااہل غیر مقبول حکومت مکمل ناکام ہو گئی ہے پیمراکی ناکام سینسر شپ میڈیاکےخلاف سازش تھی

— Sheikh Rashid Ahmed (@ShkhRasheed) November 6, 2022

سابق وفاقی وزیر نے مزید کہا کہ نااہل غیر مقبول حکومت مکمل ناکام ہو گئی ہے۔ پیمرا کی ناکام سینسر شپ میڈیا کےخلاف سازش تھی۔

‘ریڈ لائن کراس ہو اور پاکستانی خاموش ہو جائیں؟ ایسا نہیں ہو سکتا’

گزشتہ روز سینئر رہنما تحریک انصاف اسد عمر نے اپنے بیان میں کہا تھا کہ ریڈ لائن کراس ہو اور پاکستانی خاموش ہا جائیں، ایسا نہیں ہو سکتا۔

 تحریک انصاف کے سینئر رہنما نے کہا تھا کہ سازش کے تحت قوم کے کپتان کو قتل کرنے کی کوشش کی گئی، لوگوں نے دیکھا ایک سے زیادہ جگہ سے فائر کئے گئے، آٹومیٹک ہتھیار استعمال کئے گئے۔

اسد عمر نے کہا کہ کتنی دیر ایف آئی آر کٹنے سے روکیں گے؟ ایف آئی آر تو ہو گی، عمران خان نے اداروں پر الزام نہیں لگایا، عمران خان کوئی مریم نواز نہیں جو فوج کے خلاف بولے۔

ان کا کہنا تھا کہ اعظم سواتی ایک بہادر مرد ہے، قوم اب خاموش نہیں رہے گی، ریاست پاکستان کی عزت کرنا ہم سب کی ذمہ داری ہے، ریاست بھی قوم کے جذبات کا احترام کرے۔

‘عمران خان ٹھیک ہونے کے بعد دوبارہ کنٹینر پر کھڑے ہونے کی باتیں کر رہے ہیں’

دوسری جانب سینئر رہنما تحریک انصاف شاہ محمود قریشی نے اپنے بیان میں کہا تھا کہ عمران خان ٹھیک ہونے کے بعد دوبارہ کنٹینر پر کھڑے ہونے کی باتیں کر رہے ہیں۔

پی ٹی آئی رہنما نے کہا کہ تمام کارکنان کا سوال ہے ایف آئی آر کہاں ہے؟ جہاں ایف آئی آر درج ہونے میں تاخیر ہو وہاں انصاف مل سکتا ہے؟

شاہ محمود نے کہا کہ ابھی عمران خان نے میٹنگ کے لیے بلایا ہے، ہم نے ہمیشہ اداروں کی عزت کی یے، تاریخ اس بات کی گواہ ہے کہ لاہور جاگتا ہے تو سیاسی فیصلے ہوتے ہیں۔

ان کا کہنا تھا کہ تحریک انصاف کی قیادت کہتی رہی لانگ مارچ پرامن ہو گا، عمران خان کہتا ہے پائوں پر کھڑا ہوا تو کنٹینر پر کھڑا ہو جائوں گا، لانگ مارچ سے قبل کہا گیا یہ بہت خونی مارچ ہو گا، خیال تھا حملے کے بعد لوگ ڈر جائیں گے۔

انہوں نے کہا کہ تحریک چلے گی، اپنے انجام کو پہنچے گی، ہر جگہ ایف آئی آر کی آواز بلند ہونی چاہیے۔