ٹی ٹوئنٹی ورلڈ کپ کے اہم میچ میں نیدر لینڈز کے خلاف اپ سیٹ شکست کے بعد جنوبی افریقہ کے ہیڈ کوچ مارک باؤچر نے شکست کی وجہ بتا دی۔

تفصیلات کے مطابق جنوبی افریقہ کی ٹی ٹوئنٹی ورلڈ کپ مہم کا اختتام دل کی دھڑکن کے ساتھ ہوا کیونکہ پروٹیز کو آج ایڈیلیڈ اوول میں نیدرلینڈز کے خلاف زبردست شکست کا سامنا کرنا پڑا۔

ورلڈ کپ کی مہم جو پروٹیز کے بنگلہ دیش اور بھارت کو شکست دینے کے بعد ایک امید افزا نوٹ پر شروع ہوئی تھی، انتہائی مایوس کن انداز میں ختم ہوئی کیونکہ اس ٹیم نے آئی سی سی ایونٹس میں اہم مواقعوں پر شکست کے تسلسل کو برقرار رکھا۔

پروٹیز کو اس اہم ترین میچ میں 13 رنز سے شکست ہوئی تھی، جنوبی افریقہ کے ہیڈ کوچ مارک باؤچر نے میچ کے بعد پریس کانفرنس میں اپنی ٹیم کی شکست کے حوالے سے گفتگو کی۔

مارک باؤچر نے کہا کہ یوں محسوس ہوتا ہے کہ یہ میچ ہم نے نیند کی حالت میں کھیلا ہے اور جب بیدار ہوئے تب تک میچ ہمارے ہاتھ سے نکل چکا تھا۔

ہیڈ کوچ نے کہا کہ اگر آپ اس میچ کو دیکھیں تو جس طرح ہم نے کھیل شروع کیا یوں محسوس ہو رہا تھا کہ ہماری توانائی ختم ہو چکی ہیں۔

مارک باؤچر نے کہا کہ مجھے ابھی تک ٹیم ممبران سے بات کرنے کا موقع نہیں ملا تاکہ پتہ چل سکے کہ وہ کہاں غلط تھے۔

پروٹیز ہیڈ کوچ نے کہا کہ مجھے لگتا ہے کہ ہمارے منصوبے موجود تھے لیکن ہم نے ان کا کافی حد تک استعمال نہیں کیا۔ میں نے سوچا کہ اگر آپ مجموعی طور پر کھیل کو دیکھیں تو مجھے لگتا ہے کہ نیدرلینڈز نے ہمیں بولنگ کے ذریعے زیر کیا۔

مارک باؤچر کا کہنا تھا کہ نیدر لینڈز نے اچھی منصوبہ بندی کے ساتھ گیند بازی کی، لمبی سائیڈ پر بولنگ کی۔

واضح رہے کہ پروٹیز مینز ٹیم کے ہیڈ کوچ کے طور پر باؤچر کا یہ آخری میچ تھا۔ سابق وکٹ کیپر اب انڈین پریمیئر لیگ میں ممبئی انڈینز کی کوچنگ کریں گے۔