پاکستان تحریک انصاف (پی ٹی آئی) کے رہنما اسد عمر نے کہا ہے کہ قوم اس وقت عمران خان کیساتھ کھڑی ہے، عمران خان کو گرفتار کرنے کی کوشش کریں گے تو بھر پور جواب دیا جائے گا۔ 

سابق وفاقی وزیر اسد عمر نے لاہور میں میڈیا سے گفتگو کرتے ہوئے کہا کہ نگراں وزیر اعلیٰ ماضی اس بات کا گواہ ہے کہ وہ غیر جانبدار وزیر اعلیٰ نہیں بن سکتا، جسے نگراں وزیراعلیٰ لگایا گیا وہ اس عہدے کا اہل نہیں ہے۔

ایک ہفتہ گزر گیا لیکن ابھی تک الیکشن کی تاریخ کا اعلان نہیں کیا گیا

انہوں نے کہا کہ اسمبلی تحلیل ہو تو گورنر نے فوری الیکشن کا اعلان کرنا ہوتا ہے، ایک ہفتہ گزر گیا لیکن ابھی تک الیکشن کی تاریخ کا اعلان نہیں کیا گیا۔

پی ٹی آئی رہنما نے کہا کہ کے پی کے گورنر نے بھی الیکشن کی تاریخ کا اعلان نہیں کیا، کے پی نگراں کابینہ سے لگ رہا ہے جیسے پی ڈی ایم کابینہ ہے۔ جان بوجھ کر آئین کو مجروع کرنے والا غداری کا مرتکب ہوتا ہے۔

آئین کی کھلم کھلا خلاف ورزی کی جارہی ہے

اسد عمر نے کہا کہ ہائیکورٹ نے 3 بار کہا کہ فواد چوہدری کو پیش کریں لیکن نہیں کیا گیا، آئین کی کھلم کھلا خلاف ورزی کی جارہی ہے، آئین کی بالادستی کے لیے قوم عمران خان کیساتھ کھڑی ہے۔

ملک میں اس وقت تاریخ کی بدترین مہنگائی ہے

انکا کہنا ہے کہ ملک میں اس وقت تاریخ کی بدترین مہنگائی ہے، اسحاق ڈار نے دعویٰ کیا کہ ڈالر کو 200سے کم کریں گے، ڈالر 200روپے سے نیچے لانے کے دعوے کرنے والے کہاں ہیں۔

سابق وفاقی وزیر اسد عمر نے مزید کہا کہ جب تک فریش اور فیئر الیکشن نہیں ہوں گے تب تک پاکستان موجودہ تباہی سے نہیں بچ سکے گا۔