سابق وفاقی وزیر اور رہنما پی ٹی آئی اسد عمر نے کہا ہے کہ کراچی کو دیوار سے لگانے کی کوشش کی جارہی ہے اور اس شہر کو دیوار سے لگانے والے ملک کیخلاف سازش کررہے ہیں۔

تفصیلات کے مطابق پاکستان تحریک انصاف کے مرکزی سیکرٹری جنرل اسد عمر نے پریس کانفرنس کرتے ہوئے کہا ہے کہ کراچی میں پانی کا بحران ہے، کچرے کے ڈھیر لگے ہوئے ہیں، درست مردم شماری بھی نہیں کی جارہی ہے۔

بلدیاتی انتخابات دوبارہ کرانے کا مطالبہ:

انہوں نے  مطالبہ کیا ہے کہ کراچی میں دوبارہ شفاف بلدیاتی انتخابات کرائے جائیں کیونکہ الیکشن کمیشن شفاف انتخابات کرانے میں ناکام رہا ہے۔

یہ بھی پڑھیں: کراچی میں ووٹ صرف عمران خان کا ہے، اسد عمر

انہوں نے بتایا کہ پولنگ والے دن عملہ ہی نہیں پہنچا تھا، عملہ پہلے سے ٹھپے لگانے میں مصروف تھا، جس کی امجد آفریدی نے ویڈیو بنائی کس طرح ٹھپے لگائے جارہے ہیں لیکن پولیس نے ٹھپے لگانے والے کے بجائے امجد آفریدی کو گرفتار کرلیا، ان کے 2 بھائیوں پرتشدد کیا گیا، ایک کی آنکھ ضائع ہوگئی۔

اسد عمر کا کہنا تھا کہ منگھوپیر میں رابستان خان نے دھاندلی بے نقاب کی لیکن پولیس نے رابستان خان کو گرفتار کر کے تشدد کا نشانہ بنایا اور پولنگ ختم ہونے کے بعد ایسا تماشہ ہوا جو پہلے کبھی نہیں ہوا۔

ان کا کہنا تھا کہ 48 گھنٹے گزرنے کے باوجودنتائج جاری نہیں کیے گئے جس پر ڈی آر اوز کا کہنا تھا حکومت ہم پر دباؤ ڈال رہی ہے۔

انہوں نے بتایا کہ دھاندلی کے خلاف احتجاج کرنے والے کارکنوں کو گرفتار کیا گیا، سعید آفریدی، بلال غفار،عدیل احمد و دیگر ارکان پر مقدمات درج کیے گئے۔

انہوں نے کہا کہ 6 بارحکومت کرنےوالوں نے کراچی کو کچھ نہیں دیا، پیپلزپارٹی کو جلسے کیلئےدوسرے شہروں سے بندے منگوانے پڑتے ہیں تو کراچی والے پیپلزپارٹی کو کیوں ووٹ دیں گے۔

انہوں نے مزید کہا کہ سندھ کے بلدیاتی انتخابات بار بار ملتوی کیے گئے اور انتخابات ملتوی نہ ہونے پر مینڈیٹ چوری کا منصوبہ بنایا گیا اور بلدیاتی انتخابات میں دھاندلی کے ذریعے جماعت اسلامی کی سیٹیں چھینی گئیں، کراچی بلدیاتی انتخابات کے نتائج مسترد کرتے ہیں۔

اسد عمر کا کہنا تھا کہ کراچی کےعوام کسی طور پراس الیکشن کو قبول نہیں کرینگے لہٰذا سندھ کے بلدیاتی انتخابات کالعدم قرار دیئے جائیں۔

یہ بھی پڑھیں: الیکشن نہ ہونے سے پی ٹی آئی کو نہیں بلکہ ملک کو نقصان ہورہا ہے، اسد عمر