کراچی پورٹ پر سویا بین سے لدے ہرکولیس جہازکو پورٹ سے ہٹانے میں مزید تاخیر کا سامنا ہے جس کے باعث انسانی زندگیوں کیلئےخطرہ برقرار ہے، جہازکےکپتان نےتوازن برقرارنہ ہونے پراسےلے جانےسےمنع کردیا، جہازکواب آئندہ روز پورٹ قاسم منتقل کیاجائےگا۔

تفصیلات کے مطابق کیماڑی کی فضاء کو زہرآلود کرنے والے سویا بین سے لدے ہرکولیس جہاز کو اب تک پورٹ سےہٹایانہ جاسکا، ہرکولیس جہازکوپورٹ قاسم منتقل کرنے کی تیسری کوشش بھی ناکام ہوگئی ، کپتان نے توازن نہ ہونے پر جہاز لے جانےسےمنع کردیا۔

ذرائع کا کہناہے کہ سویابین سے لدے جہاز کی منتقلی کے لیے ٹگ بورڈ کے کپتان کی تیاری مکمل تھی لیکن ہرکولیس جہازکوبیلنس کرنےکاعمل مکمل نہیں ہوسکا ، جہازکواب کل پورٹ قاسم منتقل کیاجائےگا۔

خیال رہےکہ جہاز کو پہلے صبح گیارہ بجےمنتقل کرنےکافیصلہ ہواتھا تاہم انتظامیہ کا کہنا تھا کہ سمندرمیں لہروں کومدنظررکھتےہوئے جہاز کو پورٹ قاسم منتقل کردیا جائے گا۔

اس سلسلے میں کراچی چیمبر آف کامرس کے صدر آغا شہاب کا کہنا ہے کہ جہاز کی منتقلی مسئلے کا حل نہیں، سائنسی بنیادوں پر جامع تحقیقات کا آغاز کرکے ذمہ داروں کو سخت سزا دی جائے، پچیس سال سے سویا بین شپمنٹس کی آمدکے پی ٹی پر ہوتی ہے، کبھی کوئی واقعہ نہیں سنا گیا، کے پی ٹی کی سرگرمیوں میں کسی بھی قسم کے خلل سے معاشی سرگرمیوں پرانتہائی منفی اثرات پڑیں گے۔

خیال رہے کہ گزشتہ روز وفاقی وزیر علی زیدی کی زیر صدارت اجلاس میں حفاظتی اقدامات کے تحت سویابین لانے والے بحری جہاز ہرکولیس کو پورٹ قاسم منتقل کرنے اور باقی کارگو آف لوڈ کرنے کا فیصلہ کیا گیا تھا جبکہ کمشنر کراچی افتخار شالوانی کی سربراہی میں ایک کمیٹی بھی تشکیل دی گئی جو واقعے سے متعلق مزید تحقیقات کرے گی، یہ کمیٹی ماہرین اور تکنیکی افراد کی خدمات بھی لے سکے گی۔

واضح رہے کہ شہر قائد کے علاقے کیماڑی میں زہریلی گیس سے 14 اموات دراصل سویابین لانے والے امریکی جہاز ہرکولیس سے گرد پھیلنے کی وجہ سے ہوئی ہیں، سویابین لانے والا ہرکولیس جہاز کراچی پورٹ پر لنگر انداز ہے۔