لاہور ہائیکورٹ نے چیئرمین پی ٹی آئی عمران خان کی تقاریر پر پابندی کا حکمنامہ معطل کردیا۔

تفصیلات کے مطابق پیمرا کی جانب سے سابق وزیر اعظم عمران خان کی تقاریر نشر کیے جانے پر پابندی کے خلاف لاہور ہائیکورٹ نے محفوظ فیصلہ سنادیا۔

لاہور ہائیکورٹ کے  جسٹس شمس محمود مرزا نے محفوظ فیصلہ سنا یا۔

عدالت نے عمران خان کی تقاریر پر  پیمرا کا پابندی کا حکمنامہ معطل    کرتے ہوئے  پیمرا کو نوٹس جاری کرکے جواب طلب کرلیا۔

یہ بھی پڑھیں: سابق وزیراعظم عمران خان کو گرفتار کرنے کا پلان بی تیار

عدالت نے اپنے ریمارکس میں کہا کہ  سیاسی جماعت کے سربراہ کی تقاریر کی نشریات پر پابندی کیسے لگائی جاسکتی ہے۔ چیئرمین کو کہیں آئندہ سے دیکھ کے فیصلہ کریں۔

عدالت نے درخواست پر فل بینچ بنانے کی سفارش کردی۔

سماعت کے دوران   وفاقی حکومت کےوکیل  نے عمران خان کی پابندے کے فیصلے کے خلاف درخواست مسترد کرنے کی استدعا کی تھی۔

سرکاری وکیل نے موقف اپنایا کہ  پیمرا ہیڈ آفس اسلام آباد میں ہے ، درخواست کی لاہور ہائیکورٹ  میں سماعت نہیں ہوسکتی۔

واضح رہے کہ  درخواست عمران خان نے بیرسٹر احمد پنسوتہ اور اشتیاق اے خان کےتوسط سے دائر کی تھی جس میں پیمرا کو فریق بنایا گیا تھا۔

درخواست میں موقف اپنایا گیا تھا کہ عمران خان کی تقاریر پر پابندی آئین کے بنیادی حقوق کی خلاف ورزی ہے۔ آئین پاکستان شہریوں کو آزادی اظہار کی اجازت دیتا ہے۔

درخواست میں کہا گیا تھا کہ عمران خان کی تقاریر پر پابندی آئین کی سنگین خلاف ورزی ہے۔ پاکستان میں آزادی اظہار پر پابندی کو کبھی بھی شہریوں نے قبول نہیں کیا۔

درخواست میں مزید کہا گیا تھا کہ آزادی اظہار پر پابندی سے افراتفری اور سیاسی ہیجان پیدا ہوگا۔ موجودہ سیاسی صورتحال میں اس قسم کی پابندی میں ملک افراتفری کا متحمل نہیں ہوسکتا۔

یہ بھی پڑھیں: پیمرا نے عمران خان کے بیانات اور تقاریر نشر کرنے پر پابندی عائد کر دی

درخواست میں موقف پیش کیا گیا  کہ پیمرا کی جانب سے پابندی کا نوٹیفکیشن غیر قانونی طور پر جاری کیا گیا۔

عدالت نے رجسٹرار آفس  کا اعتراض برقرار رکھتے ہوئے درخواست نمٹا دی۔

واضح رہے کہ رجسٹرار لاہور ہائیکورٹ نے درخواست پر پیمرا کا مصدقہ نوٹیفکیشن منسلک نہ ہونے   کا اعتراض عائد کیا تھا۔