پر لگا کر اڑنے والے ڈالر کی اڑان کو بریک لگنے والی ہے۔آئندہ ہفتوں میں ڈالر کے مقابلے میں روپیہ مزید مستحکم ہونے کا امکان ہے۔

تفصیلات کے مطابق ماہرین معاشیات کا کہنا ہے کہ آئندہ تین سے چار ماہ میں ڈالر کی قیمت کم ہو کر 150 روپے تک آ جائے گی۔

معاشی تجزیہ کاروں کا کہنا ہے کہ آئندہ ہفتوں میں روپیہ مستحکم  ہوکر مرکزی بینک کو موقع فراہم کرے گا کہ وہ مارکیٹ میں دستیاب اضافی ڈالر ذخیرہ کرے اور غیر ملکی کرنسی کے ذخائر بڑھائے۔

ماہرین معاشیات، کرنسی ڈیلرز اور ٹیکسٹائل برآمدکنندگان کا کہنا ہے کہ پاکستانی روپیہ مارچ 2020 کے آخر تک ڈالر کے مقابلے میں 150 روپے تک آ جائے گا۔

دوسری جانب ماہرین کا  یہ بھی کہنا ہے کہ اپریل سے جون کے درمیان روپے  کی قدر میں دوبارہ کمی آئے گی اور  سال 2020 کے آخر تک روپیہ اپنی قدر کھودے گا جس سے ڈالر 164 روپے تک چلا جائے گا۔

ڈالر پانچ ماہ کی کم ترین سطح پر آگیا

معاشی ماہرین کا کہنا ہے کہ پاکستان سال 2020 میں مختلف ممالک اور مالیاتی اداروں کو قرضوں کی مد میں سود سمیت نو سے دس بلین ڈالر واپس کرے گا جس سے روپیہ پر دباؤ بڑھےگا۔

واضح رہے کہ گذشتہ روز ڈالر کی قدر مزید کم ہوکر 154.98 روپے پر آگئی تھی، جوکہ گزشتہ چھ ماہ میں روپے کے مقابلے میں ڈالر کی کم ترین شرح ہے۔

موجودہ وقت میں پاکستانی معیشت مشکلات سے نکل کر استحکام کی طرف گامزن نظر آتی ہے۔ اسٹاک مارکیٹ سے لے کر کرنسی مارکیٹ اور کرنٹ اکاؤنٹ خسارے سے لے کر انٹرنیشنل کریڈٹ ریٹنگ ادارے  سمیت سب ہی معیشت میں استحکام کی باتیں کر رہےہیں۔

کرنسی ڈیلرز کی نظرمیں آنے والے دنوں میں باہر ممالک سے کثیر مقدار میں ڈالر آنے کی توقع ہے جس کے بعد میں ڈالرکی قیمت مزید نیچے جانے کا امکان ہے۔