رواں ہفتے مہنگائی میں 0.32 فیصد کا اضافہ ہوا


سید قاسم رضاویب ایڈیٹر

22nd January, 2021
Square ad 300 x 250

ادارہ شماریات  کے اعداد و شمار کے مطابق  رواں ہفتے مہنگائی میں 0.32 فیصد کا اضافہ ریکارڈ کیا گیا ہے۔

تفصیلات کے مطابق  ادارہ شماریات نے ہفتہ وار مہنگائی کے اعدادوشمار جاری کردیے۔

رواں ہفتے مہنگائی میں 0.32 فیصد کا اضافہ ریکارڈ کیا گیا۔ ایک ہفتے میں 19 اشیاء ضروریہ کی قیمتوں میں اضافہ ہوا جبکہ  آٹھ اشیاء ضروریہ کی قیمتوں میں کمی اور 24 اشیاء کی قیمتیں مستحکم رہیں۔

ایک ہفتے میں زندہ مرغی کی فی کلو قیمت میں 8 روپے 44 پیسے ،پیٹرول  کی قیمت میں فی لیٹر 3 روپے 23 پیسے ،ہائی اسپیڈ ڈیزل  کی قیمت میں 2 روپے 97 پیسے  اضافہ ہوا۔

برانڈڈ اڑھائی کلو گھی کی قیمتوں میں 20 روپے  اور 5 لیٹر برانڈڈ کھانے کا تیل 35 روپے تک مہنگا ہوا۔

ایک ہفتے میں دال مونگ، پیاز، ماچس، مسٹرڈ آئل، گڑ، مٹن اور بیف کی قیمتوں میں اضافہ ہوا۔

دوسری جانب   ٹماٹر کی فی کلو قیمت میں 11 روپے 13 پیسے  کمی آئی اور انڈے فی درجن 13 روپے 40 پیسے کمی کے ساتھ 154 روپے تک پہنچ گئے ہیں۔

چینی کی فی کلو قیمت میں ایک روپے 24 پیسے کی کمی آئی ہے جبکہ 20 کلو آٹے کا تھیلا صرف 2 روپے تک سستا ہوا ہے۔

ایک ہفتے  میں آلو، ایل پی جی گھریلو سلنڈر، لہسن اور جلانے کی لکڑی سستی ہوئی ہے۔