الیکٹرک کار یں بنانے والی کمپنی ٹیسلا کے بانی ایلون مسک نے اپنی کمپنی کے پانچ ارب ڈالرز سے زائد کے شیئرز فروخت کر دیے۔

امریکی اخبار کی رپورٹ کے مطابق ایلون مسک نے گزشتہ ہفتے ٹوئٹر پر کرائے گئے ایک سروے کے نتیجے میں یہ شیئرز فروخت کیے۔

انہوں نے اپنے چھ کروڑ 32 لاکھ فالوورز سے سوال پوچھا تھا کہ کیا وہ ان کے ٹیکس ادائیگی  کی مد میں ٹیسلا کے10فیصد شیئرز کی  فروخت کوسپورٹ کریں گے۔

مسک کی جانب سے پوسٹ کیے گئے اس پول پر 57.9 فیصد لوگوں نے حمایت ظاہر کی تھی۔

تاہم دستاویزات سے یہ بات سامنے آئی ہے کہ شیئرز کی فروخت کے لیے کام 14 ستمبر کو شروع کیا جا چکا تھا جس سے معلوم ہوتا ہے کہ یہ فیصلہ ٹوئٹر فیصلے کے نتیجے میں نہیں کیا گیا ہے۔

ایلون مسک کی ٹرسٹ نے ٹیسلا کے تقریباً36 لاکھ شیئرز قریب چار ارب ڈالرز میں فروخت کیے۔

دستاویزات کے مطابق ایلون مسک نے مزید نو لاکھ34 ہزار شیئرز تقریباً 1.1 ارب ڈالرز میں فروخت کیے۔

اتوار کے روزایلون مسک کی ٹوئیٹ کے بعد پیر اور منگل کے روز ٹیسلا کے شیئرز کی قیمت میں 15فیصد تک کمی دیکھی گئی  جس کی قیمت میں بدھ کے روزچار فیصد اضافہ ہوا۔

ایلون مسک کے پاس اس وقت بھی 17 کروڑ شیئرز ہیں جن کی مالیت 183 ارب ڈالرز ہے۔