ملک میں مقامی سطح پر تیل اور گیس کے ذخائر میں سالانہ بنیادوں پر 7 سے 8 فیصد کمی کی گئی ہے۔

اعداد وشمار کے مطابق درآمدی فیول سے جان چھڑانے کے بجائے انحصار مزید بڑھ سکتا ہے، 9 سال میں قدرتی گیس کے ذخائر 1 ہزار 900 کیوبک فٹ سے گر کر 1 ہزار 800 کیوبک فٹ ہوگئے۔

 دستاویز میں بتایا گیا ہے کہ تیل کے ذخائر 38 کروڑ بیرل سالانہ سے گر کر 1 کروڑ 92 لاکھ بیرل تک پہنچ گئے جبکہ مقامی گیس کے ذخائر آئندہ 6 سال میں خشک ہونے کا خدشہ ہے۔

رپورٹ میں کہا گیا ہے کہ آئندہ دو سال میں گھریلو صارفین کی گیس کنکشنز کو ختم کیا جائے گا، مقامی گیس کے بجائے تمام صارفین کو ایل پی جی پر شفٹ ہونا پڑے گا۔

دستاویز کے مطابق آئندہ سردیوں میں گیس نایاب ہوگی، دو وقت کے کھانے اور ناشتے کیلئے 6 گھنٹے یا 8 گھنٹے گیس کی فراہمی پر مشاورت جاری ہے۔

اس کے علاوہ مقامی سطح پر تیل و گیس کی تلاش کی بھی کوششیں جاری ہیں، اس وقت ملک میں روزانہ کی بینادوں پر 1600 ایم ایم سی ایف ڈی گیس دستیاب ہے۔

دستاویز میں مزید بتایا گیا کہ سوئی سدرن کے پاس ساڑھے 900 اور سوئی نادرن کے پاس ساڑھے 600 ایم ایم سی ایف ڈی گیس ہے۔ سردیوں میں طلب ڈبل ہونے کے باعث لوڈشیڈنگ کرنا پڑتی ہے، سردیوں میں طلب 4 ہزار ایم ایم سی ایف ڈی سے بڑھ جاتی ہے۔

ذرائع کے مطابق درآمدی ایل این جی گھریلو صارفین کو دینا پڑتی ہے، سردیوں میں ایل این جی کے 9 کارگوز دستیاب ہوتے ہیں۔

ذرائع نے مزید بتایا کہ پاکستان سالانہ 13 ارب 50 کروڈ ڈالر کا تیل درآمد کرتا ہے اور 4 ارب 47 کروڑ ڈالر کی ایل این جی درآمد کرنا پڑتی ہے۔

گیس کی قیمتوں میں اضافہ

واضح رہے کہ 20 اکتوبر کو وفاقی حکومت نے گیس کی قیمتوں میں اضافے کی منظوری دے دی تھی، پیٹرولیم ڈویژن کی جانب سے جاری نوٹیفکیشن میں بتایا گیا تھا کہ ماہانہ 25 سے 90 مکعب میٹر تک گیس کے پروٹیکٹڈ صارفین کےلیے قیمت نہیں بڑھائی گئی تاہم پروٹیکٹڈ صارفین کےلیے فکس چارجز 10 روپے سے بڑھا کر 400 روپے کردیے گئے۔

اعلامیے میں کہا گیا ہے کہ نان پروٹیکٹڈ گھریلو صارفین کےلیے گیس کی قیمت میں 172 فیصد سے زائد اضافہ کیا گیا جبکہ ماہانہ 25 مکعب میٹر کے صارفین کےلیے قیمت 200 سے بڑھا کر 300 روپے فی ایم ایم بی ٹی یو اور ماہانہ 60 مکعب میٹر استعمال پر گیس کی قیمت 300 سے بڑھ کر 600 روپے فی ایم ایم بی ٹی یو مقرر کی گئی۔

تندوروں کے لیے گیس کی قیمت 600 روپے، پاور پلانٹس 1050 روپے فی ایم ایم بی ٹی یو برقرار ہے جبکہ سیمنٹ سیکٹر کےلیے گیس کی قیمت 4400 روپے، سی این جی سیکٹر کےلیے 3600 روپے مقرر کی گئی۔

اس کے بعد یہ خبر سامنے آئی تھی کہ نگران وفاقی کابینہ نے گیس کی قیمتوں میں اضافہ فی الحال روک دیا ہے۔

سردیوں میں گیس کی شدید کمی کی پیشگوئی

ماہر معاشیات کی جانب سے رواں سال موسم سرما میں ملک میں گیس کی شدید کمی کی پیش گوئی کی گئی ہے۔

گیس سے متعلق ماہر معاشیات نے بول نیوز سے گفتگو کرتے ہوئے کہا تھا کہ پاکستان میں گیس میں 5 سے7 فیصد کمی آئی ہے، ہم نے پروڈکشن اور ڈسٹری بیوشن کے نظام کو بہتر نہیں کیا۔

انہوں نے بتایا تھا کہ سردیوں میں گیس ڈیمانڈ 7 ہزار ایم ایم سی ایف ڈی سے بھی بڑھ جاتی ہے، نہیں لگتا سردیوں میں 6 سے 8 گھنٹوں سے زیادہ گیس آئے گی، اگر زیادہ ایل این جی امپورٹ کر بھی لیں تو ٹرمنلز نہیں ہیں۔

ماہر معاشیات کا کہنا تھا کہ کہا تھا کہ جب دنیا میں قیمتیں نیچے ہوں تو قطر سے طویل مدتی کانٹریکٹس کریں، حکومت آسٹریلیا سے بھی 15 سال کا کانٹریکٹ کرسکتی تھی۔

انہوں نے مزید کہا تھا کہ گھریلو صارفین کو30 فیصد گیس کی فراہمی ہے، بہت سے سیکٹرمشکلات کا شکار ہیں جن میں پی آئی اے بھی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے یوٹیوب چینل کو سبسکرائب کریں  https://bit.ly/3Tv8a3P اور بیل آئیکن پر کلک کریں