ایف بی آر کو تاجروں کے لیے اعلان کردہ نئی فکسڈ ٹیکس اسکیم سے 50 ارب روپے آمدن کی توقع ہے۔

فیڈرل بورڈ آف ریونیو (ایف بی آر) کے مطابق فکسڈ ٹیکس اسکیم ٹیکس ایمنسٹی نہیں ٹیکس نیٹ بڑھانے کی کوشش ہے اسکیم میں سالانہ 20 کروڑ روپے تک کاروبار کرنے والے چھوٹے دکاندار شامل ہو سکیں گے۔ جن پر سالانہ فروخت کے حساب سے ایک فیصد فکسڈ ٹیکس عائد کیا جائے گا تاہم کم از کم 25 ہزار روپے ٹیکس ادا کرنا لازم ہوگا۔

ایف بی آر کا کہنا ہے کہ اسکیم میں شامل تاجروں کو معمول کے ٹیکس آڈٹ سے استثنا حاصل ہوگا جبکہ ودہولڈنگ ٹیکس ایڈجسٹ کرنے کی سہولت بھی دی جائے گی۔ اس کے علاوہ پوائنٹ آف سیل سسٹم لگانے کی شرط بھی ختم کر دی گئی ہے۔ اسکیم رضاکارانہ ہوگی اور تاجر چاہیں تو روایتی ٹیکس ریٹرن بھی جمع کرا سکتے ہیں۔

 ایف بی آر کے مطابق رجسٹرڈ دکانوں کے باہر کیو آر کوڈ اور این ٹی این والی پلیٹ آویزاں کی جائے گی۔ حکام کا کہنا ہے کہ حقیقی سیل چھپانے یا اکاؤنٹس درست نہ رکھنے والے تاجروں کے خلاف سخت ایکشن لیا جائے گا۔ قواعد کی خلاف ورزی پر جرمانہ ہوگا اور اسکیم کی سہولتیں ختم ہو جائیں گی۔