لاہور: چیف جسٹس آف پاکستان قاضی فائز عیسیٰ نے کہا ہے کہ ججز کی تعیناتی سے پہلے ہائیکورٹس رولز میں ترامیم ضروری ہے۔

چیف جسٹس قاضی فائز عیسیٰ نے سپریم کورٹ بار سے خطاب کرتے ہوئے کہا کہ خواہش ہے کہ سپریم کورٹ مکمل ہوجائے، سپریم کورٹ اور ہائی کورٹ میں ججز کی خالی آسامیاں پرکرنا ترجیح ہے۔

انہوں نے کہا کہ ججز کی تعیناتیوں سے پہلے ہائیکورٹس رولز میں ترامیم ضروری ہے، ان ترامیم کے لئے جسٹس منصور علی شاہ کی سربراہی میں کمیٹی قائم کردی گئی ہے، ہائیکورٹس کے چیف جسٹس صاحبان سے گزارش ہے کہ آہستہ آہستہ ہائیکورٹس میں ججز کی تعداد مکمل کریں۔

قاضی فائز عیسیٰ نے کہا کہ ججز کی تعیناتیاں موجودہ طریقہ کار سے کریں یا نئے رولز کے مطابق اس پر فریقین سے بات کریں گے۔

انکا کہنا تھا کہ ٹیکنالوجی نے سپریم کورٹ کی رجسٹریوں کا معاملہ محدود کردیا ہے، کم از کوئی بھی بنچ ایک ہفتے سے کم کانہیں ہونا چاہیے، دیکھنا یہ ہے کہ ویڈیو لنک رکھیں یا رجسٹری یا دونوں کو ساتھ لے کر چلیں۔

چیف جسٹس قاضی فائز عیسیٰ نے مزید کہا کہ بار اور بنچ مختلف نہیں ایک ہے، ہمیشہ بار کے منتخب نمائندوں کی ترجیح دی، رجسٹری پربنچ بنانے کے عمل کا لاہور سے آغاز کردیا، اگلے مرحلے میں دوسری رجسٹریوں میں جائیں گے۔