پاکستانی نژاد بھارتی گلوکار عدنان سمیع خان کے چھوٹے بھائی جنید سمیع خان نے شادی کرلی ہے۔

حال ہی میں اپنے دیے گئے ایک انٹرویو میں جنید سمیع خان کا کہنا ہے کہ یہ میری زندگی کا یادگار لمحہ ہے، میری اہلیہ فاطمہ سمیع خان کا میری زندگی میں آنا ایک دلچسپ اور خوشگوار لمحہ ہے۔

انہوں نے کہا کہ میرے بھائی جو کہ بھارت میں مقیم ہیں اور دنیا کے مقبول ترین گلوکار ہیں انہوں نے بھی مجھے بھارت سے مبارکباد کا پیغام بھیجا ہے۔

ان کا کہنا تھا کہ میں بطور گلوکار کمپوزر اپنی صلاحیتوں کے جوہر دکھانا چاہتا ہوں میرے چند گانے مقبول بھی ہوئے ہیں اور مزید 2023 میں مزید گانے کمپوز کرنے کے ساتھ گاؤں گا۔

جنید سمیع خان نے یہ کہا کہ جلد میری فیملی عدنان سمیع خان سے ملاقات کرنے کے لئے دبئی جائے گی اور میں دبئی میں بھی کچھ ریکارڈنگ میں حصہ لوں گا۔

انہوں نے مزید کہا کہ میری خواہش تھی کہ میں سکواش کے کورٹس میں جہانگیر خان، جان شیر خان اور جیف ہنٹ کے ریکارڈز کو ختم کروں یا نئے ریکارڈ بناؤں پر میری یہ خواہش پوری نہ ہو سکی لیکن موسیقی کے ساتھ ساتھ گلوکاری میں جنون ہے۔